شام کی بدنام زمانہ صیدنایا جیل کے حوالے سے مزید ہولناک انکشافات سامنے آ گئے ہیں، جیل سے انسانی جسم کو کچلنے والی مشین بھی برآمد ہوئی ہے۔
غیر ملکی میڈیا رپورٹ کے مطابق بشار الاسد کے بدترین مظالم ایک کے بعد ایک سامنے آرہے ہیں، صیدنایا جیل سے انسانی جسم کو کچلنے والی ایک ہولناک مشین برآمد ہوئی ہے۔
شام کی بدنام زمانہ صیدیانا جیل میں ریسکیو ٹیمیں اور ماہرین ممکنہ زیر زمین جیل کے خفیہ تہہ خانوں کی تلاش میں مصروف ہیں صیدنایا جیل، جسے ’’انسانی مذبح خانہ‘‘ کہا جاتا ہے سے ایک ہولناک تشدد کی مشین ملی ہے جو قیدیوں کے جسموں کو کچلنے کے لیے استعمال کی جاتی تھی۔
میڈیا رپورٹ کے مطابق ہائیڈرولک مشین کی ویڈیو سوشل میڈیا پر وائرل ہورہے ہے جس کے ساتھ رسیاں اور تھیلے بھی موجود ہیں، جو مبینہ طور پر قیدیوں کی باقیات کو ٹھکانے لگانے کے لیے استعمال ہوتے تھے۔
ویڈیو کے کیپشن میں لکھا گیا کہ پھانسی کے بعد، قیدی کو مشین میں ڈال کر کاغذ کی طرح کچل دیا جاتا تھا، مشین کے نیچے خون کے بہاؤ کے لیے راستے بنائے گئے ہیں اور پھر باقیات کو ایک تھیلے میں ڈال کر جیل سے باہر پھینک دیا جاتا تھا۔
خیال رہے کہ بشار الاسد حکومت کے دھڑن تختہ ہونے کے بعد شامی جنگجوؤں نے خواتین اور بچوں سمیت سینکڑوں قیدیوں کو اس جیل سے آزاد کروایا ہے۔
شام میں بشار الاسد کا سورج اس وقت غروب ہوا جب مسلح باغی گروپ پیش قدمی اور کئی شہروں پر قابض ہونے کے بعد دارالحکومت دمشق پر بھی قابض ہوگئے جس کے بعد بشار الاسد طیارے میں بیٹھ کر ملک سے فرار اور اب روس میں سیاسی پناہ لے چکے ہیں۔
