اسلام آباد : پی آئی اے حویلیاں طیارہ حادثے کی رپورٹ بھی وزیرہوابازی غلام سرور کو پیش کردی گئی، رپورٹ کو آج عوام کے سامنے لائے جانے کا امکان ہے۔
تفصیلات کے مطابق پی آئی اے حویلیاں طیارہ حادثے کی رپورٹ بھی تیار کرلی گئی ہے اور سربراہ ایئرکرافٹ ایکسیڈنٹ انویسٹی گیشن ٹیم نے رپورٹ وزیرہوابازی کوپیش کی ، حادثے کی رپورٹ کو آج عوام کےسامنےلائےجانے کا امکان ہے۔
ذرائع کا کہنا ہے کہ پی آئی اے کا اے ٹی آر طیارہ حویلیاں حادثے کا شکار ہوا تھا، پی کے 661 سات دسمبر 2016 کو حویلیاں کے پاس گرکر تباہ ہوا تھا، حادثے میں جنید جمشید سمیت 47 افراد جاں بحق ہوئے تھے۔
مزید پڑھیں : وزیراعظم کا ماضی میں ہونیوالے طیارہ حادثات سے متعلق بڑا فیصلہ
یاد رہے وزیراعظم عمران خان نے ماضی میں ہونیوالے طیارہ حادثات کی تحقیقاتی رپورٹ پبلک کرنے کا بڑا فیصلہ کرتے ہوئے جنید جمشید طیارہ حادثے کی تحقیقاتی رپورٹ جلد پبلک کرنے کی ہدایت کی تھی۔
عمران خان کا کہنا تھا کہ پی ٹی آئی حکومت شفافیت پر یقین رکھتی ہے، طیارہ حادثات کوکئی سال گزرگئےمگررپورٹس سامنے کیوں نہیں آئیں، تمام طیارہ حادثات کی تحقیقاتی رپورٹس کو پبلک کیا جائے، رپورٹس پبلک ہوں گی تو آئندہ کے لیے مؤثر اقدامات ہو سکیں گے۔
سول ایوی ایشن حکام نے بتایا تھا کہ جنید جمشید طیارہ حادثہ رپورٹ جولائی میں پبلک کی جائے گی۔
خیال رہے کراچی طیارہ حادثے کی تحقیقاتی رپورٹ سامنے آئی تھی ، جس میں کپتان اور ائیر ٹریفک کنٹرولر کو حادثے کا ذمہ دار قرار دیا تھا۔