مسافر ٹرین ہزارہ ایکسپریس کو پیش آنے والے حادثے کے بعد وفاقی وزیر ریلوے خواجہ سعد رفیق نے کہا ہے کہ ہزارہ ایکسپریس حادثہ مکینکل فالٹ بھی ہوسکتا ہے، ٹرین مناسب رفتار سے جا رہی تھی۔
اے آر وائی نیوز کے مطابق سعدرفیق نے کہا کہ نوابشاہ اور سکھر کے اسپتالوں میں ایمرجنسی نافذ کردی گئی ہے، یہ تخریب کاری بھی ہوسکتی ہے اور مکینیکل فالٹ بھی ہوسکتاہے، میں صبح سوچ رہا تھا اللہ خیر کرے 3 دن رہ گئے ہیں کوئی بری خبرنہ آجائے۔
انھوں نے کہا کہ حادثے میں 15 سے زائد افراد کے جاں بحق ہونے کی اطلاعات ہیں، ہزارہ ایکسپریس حادثے کی تحقیقات کا حکم دے دیا ہے۔
سعد رفیق کے مطابق ہم کہہ رہے تھے 3، 2 دن رہ گئے ہیں کوئی حادثہ نہ ہوجائے اور وہی ہوا، ٹرین حادثے کے بعد آرمی چیف کی ہدایت پر پاک فوج اور رینجرز کی جائے حادثہ پرامدادی سرگرمیاں شروع ہو گئی ہیں۔
آرمی چیف کی طرف سے امدادی سرگرمیوں کے لیے پاک فوج اور رینجرز کو خصوصی ہدایات جاری کردی گئی ہیں، مزید دستوں کو حیدرآباد اورسکرنڈ سے طلب کر لیا گیا ہے۔
