لاہور: ہزارہ ایکسپریس ٹرین حادثے میں تخریب کاری کے شواہد نہیں ملے، دو شعبے حادثے کے ذمہ دار قرار دے دیے گئے۔
تفصیلات کے مطابق ہزارہ ایکسپریس ٹرین حادثے کی جوائنٹ سرٹیفیکیٹ رپورٹ مرتب کر لی گئی، یہ رپورٹ لاہور ریلوے ہیڈکوارٹر کو موصول ہو گئی، جس میں شعبہ سول اور مکینیکل کی نااہلی حادثے کی وجہ قرار دی گئی ہے۔
جوائنٹ سرٹیفیکیٹ کے مطابق حادثے میں تخریب کاری کے کوئی شواہد نہیں ملے، جب کہ حادثے کی وجہ پٹری کا ٹوٹنا اور فش پلیٹ نہ ہونا قرار دی گئی، رپورٹ میں کہا گیا ہے کہ ٹرین انجن وہیل اور ٹریک میں خرابی بھی حادثے کی وجوہ میں شامل ہیں۔
جوائنٹ سرٹیفیکیٹ میں کہا گیا ہے کہ حادثے کی شکار ٹرین کے انجن کے وہیل ڈیمج پائے گئے ہیں، اور ٹریک کو آپس میں جوڑنے کے لیے فش پلیٹ موجود نہیں تھی۔
دوسری طرف ریلوے شعبہ سول اور شعبہ مکینیکل نے حادثے کی ذمہ داری لینے سے انکار کر دیا ہے، دونوں شعبوں نے حادثے کی وجہ ایک دوسرے پر ڈال دی۔
