لہسن ہمارے کھانوں میں استعمال ہونے والا اہم جز ہے، کھانوں میں استعمال کیے جانے کے علاوہ اسے کچا کھانا بھی ہماری صحت کے لیے نہایت فائدہ مند ہے۔
ماہرین کے مطابق لہسن کے نہار منہ استعمال سے نہ صرف وزن میں کمی اور کولیسٹرول لیول متوازن رہتا ہے بلکہ جلدی امراض سے بھی نجات ملتی ہے۔
پیٹ کی چربی اور وزن کم کرنے کے لیے نہار منہ لہسن کا استعمال تجویز کیا جاتا ہے جس کے بے شمار فوائد مجموعی صحت پر مرتب ہوتے ہیں، جن افراد کو ایکنی، کیل مہاسے، وائٹ اور بلیک ہیڈز کی شکایت ہو، نہار منہ لہسن کا استعمال ان افراد کے لیے بھی نہایت مفید ہے۔
ماہرین کا یہ بھی کہنا ہے کہ لہسن ہمارے دانتوں کو مضبوط بناتا ہے، تحقیق سے پتہ چلتا ہے کہ سوجے مسوڑھوں کے علاج میں لہسن ایک اچھا متبادل علاج ہو سکتا ہے۔
لہسن میں اینٹی بیکٹیریل، اینٹی وائرل اور اینٹی فنگل خصوصیات ہیں، ان خصوصیات کی وجہ سے منہ میں موجود بیکٹیریا فوری طور پر ختم ہوجائیں گے۔
لہسن کا استعمال فٹنس کے لیے بھی بہتر ہے۔ ایک تحقیق سے علم ہوا کہ اگر آپ ورزش کرتے ہیں اور اپنی خوراک میں روزانہ کی بنیاد پر لہسن کا استعمال کرتے ہیں تو آپ کا جسم چست اور فٹ رہے گا اور آپ کو جلدی تھکاوٹ نہیں ہوگی۔
لہسن ہماری جلد کی صحت کے لیے بھی بہت مفید سمجھا جاتا ہے، اگر آپ روزانہ لہسن کھائیں گے تو آپ کی جلد داغ دھبوں، ایکنی اور کیل مہاسوں سے پاک ہوجائے گی، اس کے علاوہ لہسن میں کچھ ایسے اینٹی آکسیڈنٹس بھی پائے جاتے ہیں جو ہماری جلد کو جلدی بوڑھا نہیں ہونے دیتے۔
متعدد مطالعات سے پتہ چلتا ہے کہ لہسن کے استعمال سے کولیسٹرول کی سطح متوازن رہتی ہے جس کے سبب شریانوں میں اضافی چربی کا صفایا ہوتا ہے، لہسن خون کو صاف بناتا ہے جس کے نتیجے میں جگر کی صحت بہتر ہوتی ہے۔
