خوشبو کے لیے استعمال کیے جانے باڈی اسپریز یا ایئر فریشنر بظاہر تو اچھے معلوم ہوتے ہیں لیکن اپنے اندر ایسے اجزا رکھتے ہیں جو جان لیوا بھی ثابت ہوسکتے ہیں۔
حال ہی میں برطانیہ میں ایک 14 سالہ بچی باڈی اسپرے کے بے تحاشہ استعمال کے باعث ہلاک ہوگئی جس کے بعد ان اسپریز کے استعال پر سوالیہ نشان اٹھ گئے ہیں۔
اے آر وائی نیوز کے مارننگ شو باخبر سویرا میں پبلک ہیلتھ ایکسپرٹ بابر سعید خان نے گفتگو کرتے ہوئے کہا کہ باڈی اسپریز اور ایئر فریشنر بالعموم بڑوں اور بالخصوص بچوں کے لیے نقصان دہ ہوسکتے ہیں۔
ڈاکٹر بابر کا کہنا تھا کہ ان اسپریز میں ایسے اجزا موجود ہوتے ہیں جو سانس کے ساتھ پھیپھڑوں میں جا کر طبیعت خرابی کا سبب بن سکتے ہیں، علاوہ ازیں ان کی وجہ سے حرکت قلب بند بھی ہوسکتی ہے۔
انہوں نے کہا اگر جسم کی صفائی ستھرائی رکھی جائے، اور گھروں کو بھی صاف رکھا جائے اور ہوا کی مناسب آمد و رفت کا خیال رکھا جائے تو نہ بدبو پیدا ہوگی نہ خوشبویات کی ضرورت پڑے گی۔
ڈاکٹر بابر نے یہ بھی کہا کہ ہمارے گھروں کی تعمیر ایئر کنڈیشنر کو مدنظر رکھتے ہوئے کی جاتی ہے اور وینٹی لیشن کے تمام ذرائع بند ہوجاتے ہیں، ایسے گھروں اور کمروں میں آکسیجن کی کمی واقع ہوجاتی ہے یہی وجہ ہے کہ صبح اٹھنے کے بعد سر درد اور سر میں بھاری پن محسوس ہوتا ہے۔
