خوبصورت نظر آنا خواتین کا حق اور خواب ہوتا ہے اور وہ اس کے لیے لاکھوں جتن بھی کرتی دکھائی دیتی ہیں، اس مقصد کے لئے خواتین مہنگی سے مہنگی کریمیں اور لوشن استعمال کرتی ہیں۔
لیکن اہم بات یہ ہے کہ خواتین کی خوبصورتی کا تمام تر انحصار صحت مند جلد پر ہے اگر اسکن صحت مند ہوگی تو آپ خود بخود دلکش اور خوبصورت نظر آئیں گی۔
اس حوالے سے آے آر وائی نیوز کے پروگرام باخبر سویرا میں ماہر امراض جلد ڈاکٹر خرم مشیر نے چند اہم اور مفید مشورے دیئے کہ جس پر عمل کرکے خواتین اپنی جلد کو تروتازہ اور صحت مند رکھ سکتی ہیں۔
انہوں نے کہا کہ خواتین خوبصورت اور آئیڈیل جِلد کے لیے ٹریٹمنٹ کروانے کے بجائے خود بھی اپنی جِلد کاخیال رکھ سکتی ہیں لیکن اس کے لیے ضروری ہے کہ اپنی روزمرہ روٹین میں اسکن کیئر کو شامل کریں کیونکہ جلد کو روزانہ کی بنیادوں پر توجہ درکار ہوتی ہے۔
ڈاکٹر خرم کا کہنا تھا کہ وہ خواتین جو باقاعدگی کے ساتھ اپنی جِلد کا خیال رکھتی ہیں، وہ جِلد کے مختلف مسائل سے محفوظ رہتی ہیں۔ یہی نہیں،جِلد کی باقاعدہ حفاظت چہرے کو بڑھتی عمر کے اثرات سے محفوظ رکھتی ہے۔
انہوں نے کہا کہ اکثر لڑکیاں جو چار کریموں کے ملاپ کے ساتھ بنائے گئے پیسٹ کو استعمال کرتی ہیں وہ بے حد خطرناک ہے اس کے نتائج بہت بھیانک ہوتے ہیں۔ کیونکہ اس سے جلد پھٹنا شروع ہوجاتی ہے۔
انہوں نے بتایا کہ روزانہ ایک چمچ دیسی گھی کھانا ضروری ہے، ملتانی مٹی، ہلدی، بادام کی کلی اور لال مٹی یہ چیزیں جلد کیلئے انتہائی فائدہ مند ہیں اس سے چہرے پر قدرتی چمک اور گلو آتا ہے۔
