بورڈ کے امتحانات کی تیاری کے لیے ٹیوشن جانے والی طالبہ کو اس کے پڑوسی نے زیادتی کا نشانہ بنا ڈالا۔
بھارتی شہر نوئیڈہ میں ایک دلخراش واقعہ پیش آیا ہے جہاں پڑوسی نے بورڈ کے امتحانات کی تیاری کے لیے ٹیوشن جانے والی لڑکی کے ساتھ جنسی زیادتی کی ہے۔ پولیس نے بتایا کہ مذکورہ واقعہ 29 فروی کو پیش آیا۔
پولیس کو شکایت درج کرواتے ہوئے لڑکی کے باپ نے بتایا کہ بیٹی ٹیوشن جانے کے لیے گھر سے نکلی تو ملزم نے اسے راستے میں روک کر باتیں کرنا شروع کردیں۔ اسی دوران مذکورہ شخص نے بیٹی کے منہ پر کوئی چیز چھڑکی جس سے وہ بے ہوش ہوگئی۔
اس کے بعد وہ لڑکی کو ایک فلیٹ میں لے گیا جہاں اسے زیادتی کا نشانہ بنایا جبکہ ملزم نے طالبہ کی غیراخلاقی ویڈیوز اور تصاویر بھی بنائی ہیں اور دھمکی دی ہے کہ اگر لڑکی نے زبان کھولی تو وہ ان تصاویر کو وائرل کردے گا۔
لڑکی کے والد نے پولیس کو مزید بتایا کہ بیٹی کے بورڈ کے امتحانات چل رہے ہیں اور وہ اس سانحے کے بعد سے کافی ڈسٹرب ہے اس نے اپنی ماں کو سب سے پہلے اس واقعے کی بابت مطلع کیا۔
پولیس نے واقعے کی ایف آئی آر درج کرلی ہے۔ ملزم واقعے کے بعد سے فرار تھا تاہم پولیس نے بدھ کو 25 سالہ عثمان شفیع کو شاہ بیری فرنیچر مارکیٹ سے گرفتار کرلیا ہے۔ کیس کے حوالے سے مزید تفتیش جاری ہے۔
