بھارت میں محکمہ موسمیات نے شدید گرمی کے پیش نظر یلو الرٹ جاری کر دیا، دہلی میں سورج آگ برسانے لگا، پارہ 41 ڈگری کو چھو گیا۔
بھارتی میڈیا رپورٹس کے مطابق ریاست گجرات میں درجہ حرارت 45.6 ڈگری سے تجاوز کر گیا جبکہ راجھستان میں درجہ حرارت 46 ڈگری کو چھو گیا۔
بھارت میں محکمہ موسمیات کا کہنا ہے کہ مہارشٹرا اور مدھیہ پردیش میں بھی پارہ 43 ڈگری تک ریکارڈ کیا گیا ہے، جبکہ ہیٹ ویو سے متاثرہ ریاستوں میں درجہ حرارت معمول سے 6 سے 8 ڈگری زائد رہا۔
محکمہ موسمیات نے دہلی میں آج اور مدھیہ پردیش اور گجرات میں کل سے بارش کا امکان ظاہر کیا ہے، ہریانہ اور راجھستان میں 14 اپریل سے ہیٹ ویو کی پیش گوئی کی گئی ہے۔
دوسری جانب عالمی موسمیاتی تبدیلیوں کے باعث مستقبل میں کراچی کے موسم کے حوالے سے بھی ماہرین نے خطرے کی گھنٹی بجادی ہے۔
تفصیلات کے مطابق عالمی موسمیاتی تبدیلیاں کراچی کے موسم کو تیزی سے تباہ کرنے لگیں، شہر کے درجہ حرارت میں ہر گزرتے سال کیساتھ خطرناک حد تک اضافہ ریکارڈ کیا جارہا ہے۔
سال 2015 سے اب تک شہر میں گرمی کے کئی ریکارڈز ٹوٹ چکے ہیں جبکہ ایک دہائی کے دوران ٹمپریچر میں ہونے والا اضافہ عالمی درجہ حرارت کے مقابلے میں دس گناہ زیادہ رہا ہے۔
ماہرین نے خبردار کیا ہے کہ مستقبل میں کراچی کومزید شدید گرمی کی لہروں کا سامنا کرنا پڑسکتا ہے، شہر میں ہرگزرتا سال گرم سے گرم ترین ہورہا ہے، گزشتہ ایک دہائی کی بات کریں تو اس دوران ٹمپریچر میں غیرمعمولی اور تشویشناک اضافہ ریکارڈ کیا گیا۔
سال 2015 میں بدترین ہیٹ ویوکے دوران درجہ حرارت 44.8 سینٹی گریڈ تک پہنچا، جبکہ ہیٹ انڈیکس 66 ڈگری سینٹی گریڈ تک پہنچ گیا تھا۔
سال 2024 میں بھی ایسی ہی صورتحال دیکھنے میں آئی اور شہر شدید ترین گرمی کی لپیٹ میں رہا، ماہرین کے مطابق کراچی میں 1960 سے لے کر اب تک اوسط درجہ حرارت میں تقریباً 2.25 ڈگری سینٹی گریڈ کا اضافہ ریکارڈ کیا گیا یعنی پارہ ہر دہائی میں 0.38 ڈگری اضافہ ہوا، جو عالمی درجہ حرارت کے مقابلے میں دس گنا زیادہ ہے۔
آسمانی بجلی گرنے سے 7 افراد جان سے گئے
رات کے وقت درجہ حرارت میں دواعشاریہ چار اور دن کے اوقات میں درجہ حرارت میں ایک اعشاریہ چھ سینٹی گریڈ تک اضافہ ہوچکا ہے۔
