اسلام آباد : محکمہ موسمیات نے خبردار کیا ہے کہ کل سے تیس اپریل کے دوران ملک بھر میں شدید گرمی پڑنے کا امکان ہے۔

محکمہ موسمیات کی جانب سے ایک اور ہیٹ ویو الرٹ جاری کردیا گیا، جس میں کل سے تیس اپریل کے دوران ملک بھر میں شدید گرمی پڑنے کا امکان ظاہر کیا گیا ہے۔

محکمہ موسمیات کا کہنا تھا کہ جنوبی علاقوں میں درجہ حرارت معمول سے پانچ تا سات ڈگری زیادہ رہے گا۔۔ بالائی علاقوں میں پارہ چار تا چھ ڈگری اوپر جائے گا۔

موسم کا حال بتانے والوں نے کہا کہ شدید گرمی سے شمالی علاقوں میں برف پگھلنے کی رفتار بڑھنے کا خدشہ ہے۔

گذشتہ روز پی ڈی ایم اے نے اپریل کے اختتام تک درجہ حرارت 45 ڈگری تک جانے کا خدشہ ظاہر کیا تھا۔

ترجمان کی جانب سے کہا گیا تھا کہ پنجاب میں آج بھی ہیٹ ویواورگرمی کی لہر برقرار رہے گی ، بہاولپور، رحیم یارخان، ڈی جی خان،ملتان میں ہیٹ ویو کی لہر شدید ہو سکتی ہے۔

صوبائی ڈیزاسٹر مینجمنٹ اتھارٹی پنجاب نے ہیٹ اسٹروک سےبچاؤکیلئے ادویات کی فراہمی یقینی بنانے کی ہدایت کردی۔