بھارت کی مختلف ریاستوں میں مون سون بارشوں کا سلسلہ جاری ہے، ایسے میں آئی ایم ڈی نے کئی ریاستوں میں موسلادھار بارشوں کی پیش گوئی کی ہے۔
غیر ملکی ذرائع ابلاغ کے مطابق بھارت کے محکمہ موسمیات (IMD) کا کہنا ہے کہ جنوب مغربی مون سون مسلسل بھارت کی طرف بڑھ رہا ہے، آئی ایم ڈی نے گرج چمک اور تیز ہواؤں کی وارننگ کے ساتھ موسلا دھار بارشوں کا انتباہ دیا ہے۔
آئی ایم ڈی نے پیش گوئی کی ہے کہ آنے والے چند دنوں میں مدھیہ پردیش، چھتیس گڑھ، جھارکھنڈ، بہار اور اوڈیشہ میں بہت زیادہ بارش ہوسکتی ہے،اس وقت، مون سون ان علاقوں میں سرگرم ہے جس میں بڑے پیمانے پر بارش ہونے کی توقع ہے۔
رپورٹس کے مطابق آسام اور میگھالیہ میں آج اور کل موسلا دھار بارش کا امکان ہے۔ مشرقی مدھیہ پردیش، گجرات کے علاقے اور بہار کے کچھ حصے بھی بارش سے متاثر ہوسکتے ہیں۔
مغربی بھارت میں آئی ایم ڈی نے 22 اور 24 جون کے درمیان خاص طور پر گجرات، کونکن اور گوا، اور مدھیہ مہاراشٹرا میں، 26 جون تک جاری رہنے والی بارش میں مزید اضافے کی پیش گوئی کی ہے۔
دہلی میں آج آسمان عام طور پر ابر آلود رہنے کی توقع ہے اور آج ہلکی بارش اور گرج چمک کے ساتھ بارش کا امکان ہے۔ 50 کلومیٹر فی گھنٹہ کی رفتار سے تیز ہوائیں چل سکتی ہیں۔ آئی ایم ڈی نے پیش گوئی کی ہے کہ مون سون 24 جون تک دہلی پہنچ سکتا ہے۔
بھارت کی مختلف ریاستوں میں طوفانی بارشوں سے سیلابی صورتحال
رپورٹس کے مطابق ہماچل پردیش، اتراکھنڈ، پنجاب، ہریانہ، اور مشرقی راجستھان سمیت شمال مغربی ریاستوں کو 20 اور 26 جون کے درمیان بارش کے لیے الرٹ پر رکھا گیا ہے۔ ان علاقوں میں بارش کی سرگرمیوں میں بتدریج اضافہ متوقع ہے۔
