راولپنڈی: جڑواں شہروں میں رات سے موسلادھار بارش جاری ہے، بارش کے باعث نالہ لئی بپھر گیا ہے اور انتظامیہ نے خطرے کے سائرن بجا دیے ہیں۔
تفصیلات کے مطابق اسلام آباد اور راولپنڈی میں رات سے موسلادھار بارش جاری ہے، اب تک 200 ملی میٹر بارش ریکارڈ کی گئی ہے، نالہ لئی میں پانی کی سطح خطرے کے نشان تک پہنچ گئی اور خطرے کے سائرن بجا دیے گئے۔
ایم ڈی واسا کے مطابق رواں سیزن میں ہونے والی بارشوں میں سب سے یہ بڑا اسپیل ہے، شمس آباد میں 165 ملی میٹر، بوکڑہ میں 65 ملی میٹر بارش ریکارڈ کی گئی، نالہ لئی میں کٹاریاں کے مقام پر پانی کی سطح 19 فٹ، گوالمنڈی پل پر 18 فٹ ہے۔
ایم ڈی واسا نے کہا کہ عملہ ہیوی مشینری کے ساتھ نشیبی علاقوں سے پانی نکالنے میں مصروف ہے، اسلام آباد راولپنڈی میں بارش کے بعد ریسکیو 1122 کو الرٹ کر دیا گیا ہے، ریسکیو اہلکار نالہ لئی کے اطراف تعینات کر دیے گئے ہیں۔
انتظامیہ نے کہا ہے کہ ریسکیو کی ٹیمیں کٹاریاں، گوالمنڈی، سواں پل اور دیگر نشیبی علاقوں میں تعینات کی گئی ہیں، ریسکیو 1122 کسی بھی قسم کی صورت حال سے نمٹنے کے لیے مکمل طور پر تیار ہے، اس لیے کسی بھی ایمرجنسی کی صورت میں ریسکیو ہیلپ لائن پر فوری اطلاع دیں۔
