کراچی : شہر قائد میں مون سون کے ایک اور دھواں دھارا سپیل سے گلیاں اور محلے تالاب بن گئے اور سڑکیں ندی نالوں میں تبدیل ہوگئیں جبکہ انڈرپاس میں بھی پانی بھرگیا۔
تفصیلات کے مطابق کراچی میں آج بھی موسلادھاربارش کے باعث مختلف علاقے برساتی پانی میں ڈوب گئے، ایم جناح روڈ، صدر، شارع فیصل ، ملیر، گارڈن، نرسری، سندھی مسلم سوسائٹی دریا کا منظر پیش کرنے لگا۔
گاڑیاں اور موٹر سائیکلیں ڈوب گئیں اور شہری کئی کئی فٹ پانی میں پیدل چلنے پرمجبور ہوگئے تاہم بلدیاتی عملہ کہیں نظر نہیں آیا۔
تیز بارش کے نتیجے میں سڑکوں پر پانی جمع ہوگیا جس کے باعث ٹریفک کی روانی متاثر ہوئی اور شہر بھر میں ٹریفک کا نظام درہم برہم ہوگیا۔
صدرموبائل مارکیٹ کی سڑک پانی میں غائب ہوگئی جبکہ گارڈن پر جاری ترقیاتی کام بھی بہہ گئے اور چڑیا گھر کی طرف سے آنے والی سڑک تالاب بن گئی۔
پنجاب چورنگی انڈرپاس پانی بھر جانے کے باعث ٹریفک کے لیے بند ہوگیا ، ٹریفک کو متبادل راستوں سے گزارا جا رہا ہے۔
بارش سے اولڈ سٹی ایریاز آگرہ تاج کالونی، لیاری کی گلیاں تالاب بن گئیں اور برساتی نالوں کا پانی لوگوں کے گھر اور دکانوں میں داخل ہوگیا جبکہ ملیرندی میں بھی طغیانی سے کورنگی کراسنگ اور کازوے بند کردیا گیا اور کئی علاقوں میں سیوریج لائنیں دھنس گئی۔
