اسلام آباد: ملک میں بارش اور برفباری کے نئے اسپیل نے خطرے کی گھنٹی بجادی، ایک بار پھر مری جانے والی اہم سڑکوں کو بند کردیا گیا ہے۔
محکمہ موسمیات کے مطابق مری، گلیات اور ایوبیا میں مسلسل برفباری کا سلسلہ جاری ہے، اب تک گلیات کی بالائی چوٹیوں پر 4 سے 6 انچ تک برف پڑ چکی ہے اور یہ سلسلہ آئندہ تین روز تک جاری رہنے کا امکان ہے۔
شدید برفباری کے باعث مسییاڑی لنک روڈ، کلڈنہ اور باڑیاں جانے والی شاہراؤں کو عارضی طور پر بندکردیا گیا ہے اور سیاحوں کی آمدو رفت کو محدود کرنے پر غور کیا جارہا ہے، ضلعی انتظامیہ نے سیاحوں کو گلیات، کلڈنہ اور نتھیا گلی کی طرف رُخ نہ کرنے کی اپیل کی ہے۔
دوسری جانب چترال لواری ٹنل روڈ بھی پھسلن کی وجہ سے ٹریفک کےلیے بند کردی گئی ہے۔
یہ بھی پڑھیں: سانحہ مری پر حکومت کی بڑی کارروائی؛ اعلیٰ افسران معطل
ادھر نیشنل ہائی وے اتھارٹی نے مری میں شدید برفباری کے پیش نظ دو فرنٹ بلیڈ لوڈرز، ایک فرنٹ بلیڈ ڈمپر، ایک ٹریکٹر اور دو جیپ سائٹ پر پہنچا دیں ہیں، اس کے علاوہ دس ٹن نمک بھی اسٹاک کیا گیا ہے۔
حکام کے مطابق برف ہٹانے کی مشینری کے ساتھ ساتھ این ایچ اے اور نیشنل ہائی وے اورموٹر وے پولیس کا مددگارعملہ بھی موقع پر موجود ہے تاکہ کسی بھی قسم کی ہنگامی صورتحال سے بخوبی نبٹا جا سکے۔
واضح رہے کہ رواں ماہ کے آغاز پر بھی مری میں برف کا شدید طوفان آیا تھا، جس کے باعث تمام راستے بند ہوئے تو سیاح بُری طرح پھنس گئے، کئی افراد نے موسمی حالات کے پیش نظر اپنی گاڑیوں میں بیٹھے رہنے کا فیصلہ کیا جس کے نتیجے میں دم گھنٹے سے 23 افراد لقمہ اجل بن گئے تھے۔
