The news is by your side.

Advertisement

پیسے ادا ہو گئے، ساحل پر کئی ماہ سے پھنسا بحری جہاز رخصتی کے لیے تیار

کراچی: تمام واجبات کی ادائیگی کے بعد کراچی کے ساحل پر کئی ماہ سے پھنسا بحری جہاز رخصتی کے لیے تیار ہو گیا۔

تفصیلات کے مطابق سی ویو پر پھنسے بحری جہاز ہینگ ٹونگ 77 کی روانگی کی تیاریاں مکمل ہو گئی ہیں، جہاز کے مالک کی جانب سے پورٹ چارجز سمیت پاک بحریہ کے واجبات کی رقم کے چیک ادا کر دیےگئے۔

کراچی پورٹ ٹرسٹ کے حکام کو 1 کروڑ 55 لاکھ 48 ہزار 402 روپے ادائیگی کا چیک موصول ہو گیا، چیک کلیئرنس پراسس میں حکام نے تحریری طور پر چیک وصولی سے بھی آگاہ کر دیا، پاک بحریہ کے 80 لاکھ کے واجبات کا چیک بھی ادا کر دیا گیا ہے۔

جہاز کو پاکستانی سمندری حدود سے کھینچ کر لے جانے والی الوہاش ٹگ بوٹ کے پی ٹی پہنچ گئی، ٹگ بوٹ کا روٹ اور جہاز کھینچنے سے متعلق پلان بھی کے پی ٹی حکام کے حوالے کر دیا گیا۔

میرین مرکنٹائل ڈیپارٹمنٹ کی جانب سے اب سروے مکمل کیا جائے گا، جس کے بعد جہاز کو پورٹ کلیئرنس سرٹیفکیٹ جاری کر دیا جائے گا۔

20 اور 21 جولائی کو یہ بحری جہاز انجن خراب ہونے کی وجہ سے تیز ہواؤں کے تھپیڑے کھا کھا کر سی ویو پر آ کر پھنس گیا تھا، جب کہ بڑی کوششوں کے بعد آخر کار 7 ستمبر کو یہ جہاز سی ویو سے نکالنے میں کامیابی ملی، جس کے بعد اسے ایس اے پی ٹی ٹرمینل پر لنگر انداز کیا گیا۔

پاکستان میری ٹائم سیکیورٹی ایجنسی کی جانب سے جہاز روانگی کا پہلا این او سی جاری کر دیا گیا ہے۔

Comments

یہ بھی پڑھیں