کراچی : اینٹی نارکوٹکس فورس کے عملے نے کراچی ایئرپورٹ پر کامیاب کارروائی کرتے ہوئے مسافر کے سامان سے بھاری مقدار میں ہیروئن برآمد کرکے ملزم کو گرفتار کرلیا۔
تفصیلات کے مطابق کراچی ایئرپورٹ پر اینٹی نارکوٹکس فورس کے عملے نے سعودی عرب ہیروئن اسمگلنگ کی کوشش ناکام بنادی، مسافر میر محمد غیر ملکی ایئرلائن کی پرواز ایس وی 3505کے ذریعے جدہ جارہا تھا۔
مسافر کے بیگ کی تلاشی لی گئی تو ٹرالی بیگ کے خفیہ خانوں میں 0.240کلو گرام ہیروئن اور707میتھفیٹا مائن بھی برآمد کرلی گئی، بین الاقوامی منڈی میں اس کی قیمت کروڑوں روپے بتائی جاتی ہے۔
ترجمان اے این ایف کا کہنا ہے کہ مسافر میر محمد کو گرفتار کرکے اس سے مزید تفتیش کی جارہی ہے۔
مزید پڑھیں : کراچی ایئر پورٹ سے براؤن ہیروئن اسمگل کرنے کی کوشش ناکام ، مسافر گرفتار
یاد رہے کہ گزشتہ ہفتے بھی اے ایس ایف نے کراچی ایئر پورٹ پر اسمگلنگ کرنے کو شش ناکام بناتے ہوئے مسافر کے بیگ سے براؤن ہیروئن برآمد کی تھی، مسافر کے بیگ سے ساڑھے اٹھارہ کلو گرام براؤن ہیروئن برآمد کرکے ملزم کو گرفتار کرلیا گیا۔
