بیروت: حزب الله نے اسرائيل پر پہلی بار طاقت ور میزائل حملہ کیا ہے، لبنان سے برکان میزائل سے اسرائیلی فوج کو نشانہ بنایا گیا۔
غیر ملکی میڈیا رپورٹس کے مطابق لبنان کی حزب اللہ نے کہا کہ اس نے ہفتے کے روز لبنان کی سرحد پر اسرائیلی پوزیشنوں پر برکان میزائل سے حملے کیے، یہ میزائل 500 سے 2000 میٹر تک اپنے ہدف کو نشانہ بنانے کی صلاحیت رکھتا ہے۔
الجزیرہ کے مطابق میزائل سے دو اسرائیلی فوجی چوکیاں تباہ ہو گئیں، جوابی کارروائی کرتے ہوئے اسرائیلی طیاروں نے بھی لبنان کی سرحد پر بمباری کی۔
روئٹرز کے مطابق حزب اللہ کے حملوں سے واقف ایک لبنانی ذریعہ نے بتایا کہ اس گروپ نے ایک طاقت ور میزائل داغا تھا، جسے ابھی تک لڑائی میں استعمال نہیں کیا گیا تھا، اسرائیلی پوزیشنوں کو ایتا الشعب اور رمیخ کے دیہات سے نشانہ بنایا گیا۔ واضح رہے کہ 7 اکتوبر کو حماس کے حملے کے بعد سے حزب اللہ لبنان-اسرائیلی سرحد پر اسرائیلی افواج کے ساتھ فائرنگ کا تبادلہ کر رہی ہے۔
#BREAKING: HEZBOLLAH USE LARGE MISSILE FOR FIRST TIME THIS WAR
The explosion below is suspected to be ”Burkan” Missile from #Hezbollah.
pic.twitter.com/Ml1p5Zn244— The Watcher (@TheWatcherDaily) November 5, 2023
لبنانی قصبے خیام کے رہائشی سہیل سلامی کی جانب سے روئٹرز کے ساتھ شیئر کی گئی ویڈیو میں خیام کے قریب پہاڑیوں پر دھوئیں کی دو موٹی لکیریں اٹھتی ہوئی دیکھی گئیں، اور بتایا گیا کہ یہ علاقہ اسرائیلی فضائی حملے کی زد میں آیا ہے۔
واضح رہے کہ اسرائیلی وزیر اعظم بنجمن نیتن یاہو نے گزشتہ ماہ حزب اللہ کو دوسرا جنگی محاذ کھولنے کے خلاف خبردار کرتے ہوئے کہا تھا کہ ایسا کرنے پر اسرائیل کی جانب سے ’ناقابل تصور‘ شدت کے جوابی حملے ہوں گے جو لبنان پر بڑی تباہی لے آئیں گے۔
