سات اکتوبر کو غزہ جنگ کا ایک سال مکمل ہونے کے موقع پر حماس اور حزب اللہ نے اسرائیلی شہر پر راکٹوں کی بارش کردی۔
غیر ملکی خبر رساں ادارے الجزیرہ کی رپورٹ کے مطابق حزب اللہ نے اسرائیل کے شہر حیفا پر راکٹوں سے حملہ کردیا۔
اسرائیلی فوج نے حملے کی تصدیق کرتے ہوئے بتایا ہے کہ حزب اللہ کی جانب سے پہلی بار حیفا کو نشانہ بنایا گیاہے، حملے میں دس افراد زخمی ہوئے۔
رپورٹ کے مطابق اسرائیل کا آئرن ڈوم نامی دفاعی نظام بھی راکٹ حملے روکنے میں بری طرح ناکام رہا اور راکٹ اپنے ہدف پر جاکر لگے۔
اس حوالے سے حزب اللہ کا کہنا ہے حیفا میں اسرائیل کے بحری اڈے کو نشانہ بنایا گیا، لبنانی سرحد پر اب بھی لڑائی جاری ہے۔
خبر رساں ایجنسی ”روئٹرز“ کے مطابق اسرائیلی فوج کی جانب سے جاری بیان میں کہا گیا کہ پیر کے روز شام 5 بجے تک تقریباً 135 میزائل اسرائیلی علاقے میں داخل ہوئے۔
حماس کے اتحادی حزب اللہ نے کہا کہ اس نے حیفہ کے جنوب میں ایک فوجی اڈے کو ”فادی 1“ میزائلوں سے اور بعد میں حیفہ کے شمال میں دوسرے علاقوں کو میزائلوں سے نشانہ بنایا۔
حزب اللہ نے یہ بھی کہا کہ اس نے بحیرہ گیلی کے ساحل پر 65 کلومیٹر (40 میل) دور تبریاس پر ایک اور حملہ کیا۔
تازہ جھڑپ میں دو اسرائیلی فوجی ہلاک ہوگئے۔ گزشتہ رات بھی اسرائیلی طیاروں نے جنوبی بیروت پر بمباری کی جس کے نتیجے میں 12افراد شہید اور متعدد زخمی ہوگئے۔
اسرائیلی فوج کے شمالی غزہ کے جبالیہ پناہ گزین کیمپ سے فوری انخلا کے حکم کے بعد بھاری بمباری میں کم از کم 17 افراد ہلاک ہوگئے، جن میں 9 فلسطینی بچے بھی شامل ہیں۔
اکتوبر 2023 کے بعد سے اسرائیلی حملوں میں غزہ میں کم از کم 41,909 افراد ہلاک اور 97,303 زخمی ہوئے ہیں۔ اسرائیل میں، 7 اکتوبر کو حماس کی قیادت میں ہونے والے حملوں میں کم از کم 1,139 افراد ہلاک اور 200 سے زیادہ افراد یرغمال بنائے گئے۔
