بیروت : لبنان کی مزاحمتی تنظیم حزب اللہ نے کہا ہے کہ حالیہ زمینی کارروائیوں کے آغاز سے اب تک مجموعی طور پر 55 اسرائیلی فوجی ہلاک اور 500 سے زیادہ افسران و اہلکار زخمی ہو چکے ہیں۔
غیر ملکی خبر رساں ادارے کی رپورٹ کے مطابق ایک بیان میں کہا گیا ہے کہ حزب اللہ اسرائیلی فوج کو مسلسل جانی اور مالی نقصان پہنچا رہی ہے، جس میں افسران اور فوجیوں کی بڑی تعداد شامل ہے اور یہ کارروائیاں جنوبی لبنان کی محاذوں پر کی گئیں۔
اس کے علاوہ اب تک کی جاری لڑائی میں اسرائیل کے 20 مرکاوا ٹینک اور چار فوجی بلڈوزر بھی تباہ کردیئے گئے ہیں۔
لبنانی سرحد پر زمینی آپریشنز کا ذکر کرتے ہوئے بیان میں کہا گیا کہ اسرائیلی فوج نے 70ہزار سے زیادہ فوجیوں، سینکڑوں ٹینکوں اور فوجی گاڑیوں کے ساتھ پانچ فوجی ڈویژنز تعینات کر رکھی ہیں۔
اس کے برعکس حزب اللہ کے سیکڑوں مزاحمتی جنگجو اسرائیل کی کسی بھی زمینی پیش قدمی کا مقابلہ کرنے کے لیے مکمل طور پر تیار ہیں۔
بیان میں مزید کہا گیا ہے کہ گزشتہ ہفتے کے دوران حزب اللہ کی جانب سے اسرائیلی فوج کے ساتھ جھڑپوں میں مزید شدت آئی ہے۔
اسرائیلی فورسز نے مشرقی اور مغربی سیکٹرز سے سات دیہات کی جانب پیش قدمی کی، تاہم حزب اللہ کا کہنا ہے کہ اس کے جنگجو پہلے سے تیار شدہ حکمت عملی کے تحت اسرائیلی فوج کو کامیابی سے نشانہ بنا رہے ہیں اور سرحدی علاقوں میں گھات لگا کر ان کے حملوں کا جواب دے رہے ہیں۔
بیان کے مطابق اس کے علاوہ حزب اللہ کا میزائل یونٹ بھی مزید طاقتور ہو رہا ہے اور اسرائیلی فوجی مقامات اور بیرکوں کو ان میزائلوں کی مدد سے نشانہ بنایا جارہا ہے ، جن میں پہلی بار استعمال ہونے والے جدید ڈرونز بھی شامل ہیں۔
حزب اللہ کا مزید کہنا ہے کہ اسرائیلی فورسز ابھی تک سرحد کے قریب کسی بھی لبنانی گاؤں کا مکمل کنٹرول حاصل کرنے میں ناکام رہی ہیں۔
واضح رہے کہ گزشتہ روز جنوبی لبنان میں حزب اللہ سے جھڑپ کے دوران اسرائیلی فوج کو بھاری جانی و مالی نقصان کا سامنا کرنا پڑا ہے، تازہ جھڑپوں کے دوران 5 اسرائیلی فوجی ہلاک ہوئے۔
بین الاقوامی خبر رساں ادارے کی رپورٹ کے مطابق اسرائیلی فوج کے بیان میں جنوبی لبنان میں حزب اللہ کے ساتھ جھڑپ میں 5 اسرائیلی فوجیوں کی ہلاکت کی تصدیق کردی گئی ہے۔
اسرائیلی فوج کے مطابق ہلاک ہونے والے فوجیوں کا تعلق گولانی بریگیڈ سے ہے اور ان میں ایک میجر اورایک کیپٹن بھی شامل ہے۔
