انسانی صحت کی بہتری اور تمام افعال کو بہترین طریقے سے انجام دینے کے لئے جسم کو مناسب کولیسٹرول کی ضرورت ہوتی ہے۔
کولیسٹرول قدرتی طور پر خلیات میں پایا جاتا ہے اور ہارمونز، وٹامن ڈی اور چکنائی کو ہضم کرنے والے مواد کو بنانے میں مدد دیتا ہے۔
موجودہ دور میں بے ترتیب طرز زندگی، غلط طریقوں سے کھانے پینے کی عادات کی وجہ سے لوگوں کے جسم میں خراب کولیسٹرول کی سطح بڑھ رہی ہے۔
یاد رکھیں!! یہ جسم کے لئے مفید ہونے کے ساتھ اس کی خون میں اضافی مقدار ہارٹ اٹیک اور فالج سمیت بہت سے خطرناک امراض کا سبب بن سکتی ہے۔
ماہرین صحت کا کہنا ہے کہ اگر آپ کے جسم میں اس کا لیول بہت زیادہ بڑھ گیا ہے تو یہ شریانوں میں جمع ہو کر امراض قلب کا سبب بن سکتا ہے۔
ہر ایک جسم میں اس کی دو اقسام ہوتی ہیں، پہلا ایل ڈی ایل (کم کثافت والا لیپو پروٹین) اور دوسرا ایچ ڈی ایل (ہائی ڈینسٹی لیپو پروٹین) ہائی ڈینسٹی لیپو پروٹین جو ہماری صحت لیے بہت اچھا ہے۔
جرنل آف دی امریکن اکیڈمی آف ڈرمیٹولوجی’ میں شائع ہونے والی ایک تحقیق کے مطابق جب کسی شخص کے جسم میں کولیسٹرول کی سطح بڑھ جاتی ہے تو اس کے بعد جسم کے کچھ حصوں سے کچھ سگنل ظاہر ہونے لگتے ہیں جس کی تفصیلات مندرجہ ذیل سطور میں بیان کی جارہی ہیں۔
کولیسٹرول میں اضافے کی علامات
ہمارے جسم میں ایل ڈی ایل کی مقدار زیادہ ہونے کی وجہ سے پیر کے ناخن نازک اور ٹوٹنے لگتے ہیں۔ ماہرین کا کہنا ہے کہ ایل ڈی ایل کی مقدار زیادہ ہونے کی وجہ سے ناخنوں کے بڑھنے کی رفتار کم ہوجاتی ہے۔
اس کے علاوہ ساتھ ہی پیر کے ناخن بھی ہلکے پیلے ہو جاتے ہیں۔ یہ بھی کہا جاتا ہے کہ ناخنوں کے رنگین ہونے کی ایک وجہ پیروں میں خون کا بہاؤ کم ہونا بھی ہے۔
اس کے ساتھ ساتھ ہائی کولیسٹرول کی وجہ سے ٹانگوں میں خون کا بہاؤ کم ہو جاتا ہے اور ٹانگوں کی رنگت پیلی پڑ جاتی ہے۔ اس کے علاوہ ناخنوں پر نیلے یا سیاہ دھبوں کو بھی خراب کولیسٹرول لیول سمجھا جاتا ہے۔
کولیسٹرول لیول کو کیسے کنٹرول کریں؟
ماہرین کے مطابق جسم میں ہائی کولیسٹرول لیول کو کم کرنے کے لیے پھل، سبزیاں، اناج اور پروٹین والی خوراک لیں۔ چکنائی والی غذاؤں سے پرہیز کریں جو کولیسٹرول کی سطح کو بڑھاتی ہیں۔
اپنے جسم میں پسینہ لانے کے لیے روزانہ ورزش کریں جیسے دوڑنا، چلنا، سائیکل چلانا وغیرہ۔ ایسا کرنے سے جسم میں کولیسٹرول کی سطح آسانی سے کم ہو جائے گی۔
تمباکو نوشی ایل ڈی ایل کولیسٹرول کی سطح کو بڑھاتی ہے، اس لیے اس عادت کو مکمل طور پر چھوڑ دینا چاہیے، اپنا وزن کم کرکے بھی خراب کولیسٹرول کی سطح کو کم کیا جاسکتا ہے۔
اس کے علاوہ شدید تناؤ اور اضطراب بھی جسم میں خراب کولیسٹرول کی سطح کو بڑھانے کا ایک عنصر ہو سکتا ہے۔
