سابق وزیر خارجہ حنا ربانی کھر کا کہنا ہے کہ بھارتی وفد نے اقوام متحدہ کی عمارت میں قدم نہیں رکھا ہم نے سب کے پاس جاکر حقیقت بیان کی۔
اے آر وائی نیوز سے خصوصی گفتگو کرتے ہوئے سابق وزیر خارجہ حنا ربانی کھر نے کہا کہ جب آپ کچھ ٹھیک کرتے ہیں تو دنیا آپ کے پیچھے کھڑے ہوجاتی ہے، بھارتی وفد نے نیویارک میں ہوتے ہوئے بھی اقوام متحدہ کی عمارت میں قدم تک نہیں رکھا ہم سیکریٹری جنرل سے لے کر ہر شخص کے پاس گئے۔
انہوں نے کہا کہ ہمیں کوئی بیانیہ نہیں بیچنا حقیقت بیان کرنا ہے، دنیا کو بتایا کہ ایک ایٹمی ملک کی فوجی طاقت کا بت گر گیا اب تو مغرب بھی ڈرتا ہے بھارت اپنی حفاظت خود نہیں کرسکتا۔
حنا ربانی کھر کا کہنا تھا کہ بھارت دنیا سے کہہ رہا ہے کہ اسے ملک سے باہر حملے کی اجازت دی جائے، بھارت جب چاہے کہہ دیتا ہے کہ کشمیر کوئی مسئلہ ہی نہیں اور بھارت کے بقول سلامتی کونسل کی قراردادیں بھاڑ میں جائیں۔
