The news is by your side.

Advertisement

یا رحمۃ لِلْعَالَمين: وارفتہ و شیفتہ غیر مسلم نعت گو شعرا کا تذکرہ

نبی کریم صلی اللہ علیہ وسلم کی ذاتِ مبارک، مسلمانوں کے آسمانی صحیفے قرآن مجید میں خالقِ حقیقی کا اپنے رسول کی عظمت و بڑائی بیان کرتے ہوئے کئی مقامات پر خوب صورت ناموں سے مخاطب کرنا اور رسولِ کریم کی سیرت و کردار کی کشش نے غیر مسلم شعرا کو بھی آپ صلّی اللہ علیہ وسلم سے عقیدت اور محبت کے اظہار کے لیے نعت کہنے پر آمادہ کیا

برصغیر پاک و ہند میں بسنے والے ہندو شعرا کی بات کی جائے تو کئی نام ہیں جنھوں نے نبی کریم کے دنیا پر بلا تفریق احسانات سے متاثر ہو کر نذرانہ عقیدت پیش کیا۔

متحدہ ہندوستان کے مخلوط معاشرے میں اگرچہ ہندو مسلم تعلقات میں ایک کشیدگی ہمیشہ رہی اور دونوں قوموں کے تہذیب و تمدن میں واضح اختلاف رہا، اس کے باوجود اہلِ فکر و قلم میں اس حوالے سے بے پناہ عقیدت و احترام اور روایتی جوش و جذبہ دیکھنے کو ملتا ہے۔ ہندو شعرا ہی نہیں سکھ، بدھ مذہب کے پیروکار اور دیگر مذاہب کے ماننے والے بھی اس میں‌ شامل ہیں۔

غیر مسلم شعرا کی نعت گوئی اردو ادب کا ایک موضوع رہا ہے جس میں ایسے کلام کو اکٹھا کرنے کی اوّلین کوشش مشہور شاعر مرحوم والی آسی نے کی تھی اور اس کے بعد بھی یہ سلسلہ جاری رہا۔ یوں تو اردو میں غیرمسلم نعت گو شعرا کی تعداد کئی سو تک پہنچتی ہے، لیکن یہاں ہم چند شعرا کا تذکرہ کررہے ہیں۔

دورِ جدید کے پہلے غیر مسلم اہم نعت گو شاعر منشی شنکر لال ساقی (1890) ہیں۔ انھوں نے اردو اور فارسی دونوں زبان میں اشعار کہے۔

مہاراجہ سرکشن پرشاد معروف ہندو نعت گو شاعر تھے جن کے اشعار جذب و شوق اور حبِّ رسول سے لبریز ہیں۔

دلو رام کوثری بھی نعت گوئی میں بہت مشہور ہوئے۔ برصغیر کے مشہور صوفی پیر جماعت علی شاہ نے آپ کی شاعری سے متاثر ہوکر آپ کو ’حسان الہند‘ کا لقب دیا تھا۔ کوثری صاحب نبی کریم کی محبت و شفقت اور حلم و درگزر سے بہت متاثر تھے اور اسی لیے ان صفاتِ عالیہ کو زیادہ اپنی شاعری کا موضوع بنایا۔

پنڈت بالمکند جو عرش ملیسانی کے نام سے مشہور ہیں، صاحب ِدیوان نعت گو شعرا میں سے ہیں۔ آپ کے مجموعہ کا نام’ آہنگِ حجاز‘ ہے۔

دیگر ہندو نعت گو شعرا میں پنڈت شیو ناتھ، منشی للتا پرشاد شاد، پربھو دیال رقم، پنڈت دیا شنکر نسیم لکھنوی، منشی درگا سہائے سرور جہان آبادی، چاند بہاری لال ماتھر صبا، تلوک چندر محروم، گوپی ناتھ امن، پنڈت برج نرائن دتا تریا کیفی، رگھوپتی سہائے فراق گورکھپوری شامل ہیں۔

Comments

یہ بھی پڑھیں