اسلام آباد : وزارت داخلہ نے دو شناختی کارڈ اور پاسپورٹ رکھنے والوں کے لیے ایمنسٹی کا اعلان کردیا ، جس کے تحت ایک پاسپورٹ ،شناختی کارڈ کسی سزا کے بغیر ختم کیا جاسکے گا۔
تفصیلات کے مطابق وزارت داخلہ نے دہرے شناختی کارڈز پر 2 پاسپورٹ بنانے والوں کیلئے ایمنسٹی کا اعلان کردیا ، اس حوالے سے ذرائع وزارت داخلہ نے بتایا کہ 38000 پاکستانیوں نے جعلسازی سے 2 شناختی کارڈز بنوائے، ان شناختی کارڈز پر 2 سٹیزن نمبر اور 2 پاسپورٹ جاری ہوئے۔
ذرائع نے کہا کہ ایسے پاسپورٹس کے تمام 38ہزار لوگوں کوبلیک لسٹ کیا گیاہے، 2 شناختی کارڈز اور پاسپورٹ بنانے والوں کو 3 سال سزا کا قانون ہے۔
ذرائع کا کہنا تھا کہ وزارت داخلہ نے جعل سازی سے 2 پاسپورٹ والوں کیلئے ایمنسٹی کا اعلان کیاہے، ایمنسٹی کےتحت ایک پاسپورٹ اور شناختی کارڈ کسی سزا کے بغیر ختم کیا جاسکے گا۔
ذرائع کے مطابق ایمنسٹی سے فائدہ نہ اٹھانے والوں کو سخت سزا دیکر جیل بھیجا جائے گا اور ایسے افراد جو جرائم پیشہ ریکارڈ کے ساتھ ہوں گے، ایمنسٹی سےفائدہ نہیں اٹھا سکتے۔
