کراچی: شہر قائد کے علاقے گلشن اقبال میں ارشاد نامی شخص کو غیرت کے نام پر قتل کردیا گیا۔
تفصیلات کے مطابق گزشتہ روز کراچی کے علاقے گلشن اقبال بلاک 8 میں فائرنگ کا واقعہ پیش آیا تھا جس کے نتیجے میں ایک شہری ہلاک ہوگیا تھا۔
پولیس کی ابتدائی تفتیش کے مطابق مقتول کی شناخت ارشاد کے نام سے ہوئی جو پارہ چنار کا رہائشی تھا اور کراچی میں گاڑی چلانے کا کام کرتا تھا۔ ارشاد کو اُس وقت نشانہ بنایا گیا جب وہ کسی کام سے گاڑی میں اکیلا جارہا تھا۔
مزید پڑھیں: کراچی: غیرت کے نام پر قتل ہونے والی لڑکی کی قبر کشائی
واقعے کے بعد پولیس نے مقتول کی لاش کو اسپتال منتقل کیا، پوسٹ مارٹم رپورٹ میں یہ بات سامنے آئی کہ مقتول کو پانچ گولیاں ماری گئیں۔
ڈی آئی جی ایسٹ نے تھانہ گلشن اقبال کو شہری کے قتل کی تحقیقات کا حکم دیا، ایک روز چھان بین کے بعد مقتول کے بھائی نے پولیس کو اپنا بیان ریکارڈ کرایا۔
ایس پی گلشن غلام مرتضیٰ کا کہنا تھا کہ ارشاد نامی شہری کو غیرت کے نام پر قتل کیا گیا ، مقتول کے پارہ چنار میں ایک خاتون کے ساتھ تعلقات تھے جس پر اُسے وہاں چند ماہ قبل قتل کردیا گیا تھا۔
یہ بھی پڑھیں: سال 2017: گیارہ ماہ میں 343 خواتین غیرت کے نام پر قتل
پولیس حکام کے مطابق خاتون کے قتل کے بعد ارشاد کراچی بھاگ کر آیا اور اس نے یہی سکونت اختیار کرلی۔
غلام مرتضیٰ کا کہنا تھا کہ ’مقتول کے بھائی نے اس بات کی تصدیق کی ہے کہ ارشاد کو پنجائیت کے فیصلے پر ہی قبیلے کے لوگوں نے فائرنگ کر کے قتل کیا‘۔
