اسلام آباد: وزیر اطلاعات شبلی فراز نے ملک میں مہنگائی کے حوالے سے اپنے ایک بیان میں کہا ہے کہ وزیر اعظم کی اولین ترجیح مہنگائی کو کنٹرول کرنا ہے، امید ہے قیمتوں کو کنٹرول میں لے آئیں گے۔
شبلی فراز کا کہنا ہے کہ اسلام آباد پرائس کنٹرول کمیٹی کو ختم کر دیا گیا ہے، نرخ فہرستوں کو کنٹرول کرنے کی ذمہ داری اسسٹنٹ اور ڈپٹی کمشنرز کی ہے۔
انھوں نے کہا پرائس لسٹ میں دیکھا گیا کہ ایک مارکیٹ میں الگ اور دوسرے میں الگ قیمتیں ہیں،مختلف قیمتوں میں یکسانیت لانے کے لیے مؤثر اقدام کر رہے ہیں۔
واضح رہے کہ ملک میں مہنگائی اپنے عروج پر ہے اور دن بہ دن اس میں اضافہ ہوتا جا رہا ہے، اشیائے ضروریہ سے لے کر پیٹرول اور گیس بجلی تک ہر شے مسلسل مہنگی ہو رہی ہے، جس سے عام آدمی شدید مشکلات کا شکار ہو چکا ہے۔
آج اسلام آباد میں وزیر اعظم عمران خان کی زیر صدارت مہنگائی اور اشیائے ضروریہ کی قیمتوں سے متعلق اجلاس بھی ہو رہا ہے، جس میں مہنگائی میں کمی لانے سے متعلق اہم فیصلے متوقع ہیں۔ شبلی فراز نے اپنے بیان میں کہا کہ عوام پر بوجھ ڈالنے کی بجائے وسائل کا صحیح استعمال کر کے متبادل پر غور کیا جائے گا۔
انھوں نے ایک بار سندھ حکومت پر تنقید کرتے ہوئے کہا کہ سندھ حکومت صوبے کے عوام کو 6 سالہ پرانی گندم دے رہی ہے، گندم بر وقت ریلیز نہ کر کے سپلائی میں تعطل پیدا کیا گیا، سندھ حکومت نے صوبے اور کراچی کے عوام کو مہنگا آٹا خریدنے پر مجبور کیا، اور بلواسطہ طریقے سے عوام کو نقصان پہنچایا۔
