چین کے شمال مشرقی صوبے میں ایک ریسٹورنٹ میں خوفناک آتشزدگی کے نتیجے میں 22 افراد زندہ جل گئے جب کہ متعدد جھلس کر زخمی ہوگئے۔
چینی میڈیا کے مطابق یہ افسوسناک واقعہ چین کے شمال مشرقی صوبے لیاؤننگ کے شہر لیاؤیانگ کے ریسٹورنٹ میں منگل کی دوپہر میں لگی۔ اس وقت ریسٹورنٹ میں شہریوں کی بڑی تعداد کھانےکے لیے موجود تھی۔
اچانک لگنے والی آگ اتنی خوفناک تھی کہ اس میں 22 افراد زندہ جل گئے جبکہ متعدد جھلس کر زخمی ہو گئے۔ فائر فائٹرز نے کئی گھنٹوں کی جدوجہد کے بعد آگ پر قابو پایا۔
حکام کے مطابق آگ لگنے کی وجہ تاحال سامنے نہیں آسکی ہے تاہم اس سانحے کی تحقیقات جاری ہیں اور آگ لگنے کی وجوہات تلاش کی جا رہی ہیں۔
چین کے صدر شی جن پنگ نے آتشزدگی کے واقعے پر افسوس کا اظہار کرتے ہوئے مقامی حکام کو زخمیوں کو علاج کے لیے ہر ممکن سہولیات اور ان کے اہل خانہ کو مدد فراہم کرنے کی ہدایت کی ہے۔
اس کے ساتھ ہی چینی صدر نے متعلقہ حکام کو ملک بھر میں آگ سے حفاظت کے اقدامات کو مضبوط بنانے کی ہدایات بھی کی ہیں۔
واضح رہے کہ یہ رواں ماہ چین میں آتشزدگی کا دوسرا بڑا سانحہ ہے۔ 9 اپریل کو، شمالی چین کے ہیبی صوبے کے چینگڈے شہر کی لونگہوا کاؤنٹی میں ایک نرسنگ ہوم میں لگنے والی آگ میں 20 بزرگ شہری ہلاک ہو گئے تھے۔
