اسپتال والوں نے غفلت کی انتہا کردی، اہل خانہ کو بزرگ کے بجائے اجنبی کی لاش تھما دی، باڈی سوئپنگ کے واقعے نے لواحقین کو حیران و پریشان کردیا۔
بھارتی ریاست تمل ناڈو کے علاقے تروتنی مین ایک چونکا دینے والا واقعہ سامنے آیا، جہاں ایک بزرگ کی موت کے بعد اسپتال انتظامیہ نے لاپروائی برتتے ہوئے 69 سالہ کھیت مزدور راجیندرن کی لاش کو بہار پہنچادیا اور اجنبی نوجوان کی لاش فیملی کو دے دی۔
راجیندرن پچھلے کچھ سالوں سے پیٹ کی شدید تکلیف میں مبتلا تھا، بیماری سے تنگ آکر اس نے کیڑے مار دوا پی تھی، تاہم وہ تروولور میڈیکل کالج میں علاج کے دوران چل بسا۔
اسپتال کی اس شرمناک حرکت اور باڈی سوئپنگ نے اہل خانہ کو کافی پریشانی میں مبتلا کیا، راجندرن کی موت کے بعد جب پوسٹ مارٹم کے بعد لاش گھر والوں کو سونپی گئی اور انھوں نے کپڑا ہٹا کر چہرہ دیکھا تو دنگ رہ گئے۔
اسپتال انتظامیہ سے سوال کیا گیا تو انھیں بتایا گیا کہ غلطی سے لاش کا تبادلہ ہوا، تاہم اچھنبے کی بات تو یہ تھی کہ راجندرن کی حقیقی لاش مردہ خانے میں موجود نہیں تھی۔
مشتعل لواحقین نے واقعہ سامنے آنے کے بعد اسپتال کے مردہ خانے میں ہنگامہ کھڑا کر دیا، تفتیش میں یہ بات سامنے آئی کہ جس لاش کو لواحقین کے حوالے کیا گیا وہ بہار کے نوجوان کی تھی،
اس شخص کی حال ہی میں ایک حادثے میں موت ہوئی تھی، انتہائی غفلت کے سبب راجندرن کی لاش غلطی سے اسی نوجوان کے نام پر بہار بھیج دی گئی۔
ایمبولینس ڈرائیور سے رابطہ کیا گیا تو پتا چلا کہ وہ حیدرآباد سے تقریباً 800 کلومیٹر کا فاصلہ طے کرچکا ہے، پولیس نے ڈرائیور کو فوری طور پر تروتنی واپس آنے کی ہدایت کی ہے۔
