یمن کے حوثیوں نے ایران سے اظہار یکجہتی کرتے ہوئے وسطی اسرائیل پر بیلسٹک میزائل سے حملہ کر دیا۔
قطری شریاتی ادارے الجزیرہ کی رپورٹ کے مطابق اسرائیلی فوج نے بتایا تھا کہ ملک کے وسطی علاقوں کو نشانہ بنانے والے کچھ میزائل یمن سے داغے گئے تاہم اب حوثیوں نے اس کی تصدیق کر دی۔
ایران اسرائیل کشیدگی سے متعلق تمام خبریں
المسیرہ ٹی وی پر جاری ایک بیان میں حوثیوں نے کہا کہ یہ حملے ایرانی فوج کے ساتھ مل کر کیے گئے، حملے میں متعدد ’فلسطین 2 ہائپرسونک بیلسٹک میزائل‘ شامل ہیں۔
انہوں نے بتایا کہ حملے مقبوضہ جافہ کے علاقے میں حساس مقامات پر کیے گئے۔
الجزیرہ نے بتایا کہ اطلاعات ہیں کہ وسطی اسرائیل میں ہونے والے حملوں میں کم از کم 4 افراد ہلاک اور درجنوں زخمی ہوئے، شمالی اسرائیل پر حملوں میں کم از کم چار دیگر بھی مارے گئے۔
13 جون 2025 کو یمن کی حوثیوں نے اسرائیل پر میزائل داغتے ہوئے ایران کا ساتھ نہ چھوڑنے کا اعلان کیا تھا۔
یمن کے حوثی رہنما نے اسرائیل کو انتباہ کرتے ہوئے کہا تھا کہ ایران یا کسی بھی مسلم ملک کو اسرائیلی جارحیت کے سامنے تنہا نہیں چھوڑیں گے۔
حوثی رہنما نے کہا تھا کہ فلسطین اور لبنان کی طرح ایران کا بھی بھرپور دفاع کریں گے۔
