نیشنل کمانڈ اینڈ آپریشن سینٹر (این سی او سی) نے ملک میں کورونا ویکسین کی دستیابی کی صورتحال پر اطمینان کا اظہار کیا ہے۔
تفصیلات کے مطابق لیفٹیننٹ جنرل حمود الزمان کی زیرصدارت این سی او سی کا اجلاس ہوا جس میں معاون خصوصی صحت ڈاکٹر فیصل سلطان، چیئرمین این ڈی ایم اے سمیت دیگر نے شرکت کی۔
اجلاس میں این سی او سی نے رواں ماہ کے ویکسین خریداری پلان پر غور کیا گیا اور بتایا گیا کہ مختلف اقسام کی ویکسین کی 21.13 ملین ڈوز پاکستان پہنچ چکی ہیں کوروناویکسین کی 17ملین ڈوز حکومت پاکستان نےخریدی ہیں۔
ویکسین خریداری کیلئے مختص 1.2ارب ڈالر فنڈز کے استعمال پر بریفنگ دیتے ہوئے بتایا گیا کہ صوبے اپنی ضرورت کےمطابق ویکسین کی خریداری کر سکتے ہیں۔
این سی او سی نے ملک میں کورونا ویکسین کی دستیابی کی صورتحال پر اطمینان کا اظہار کیا ہے جب کہ گلگت بلتستان میں کورونا کیسز میں اضافے پر اظہار تشویش کیا ہے۔اجلاس میں فیصلہ کیا گیا کہ گلگت بلتستان اور نادرن ایریاز میں ایس او پیز پر سختی سے عملدرآمد کرایا جائے گا۔
اعلامیہ میں واضح کیا گیا ہے کہ صوبے تعلیمی اداروں میں گرمیوں کی تعطیلات کےفیصلےکے مجاز ہیں ۔
