موسم سرما میں پاؤں کی ایڑھیاں خشک ہو کر پھٹ جانا عام سی بات ہے، ماہرین کے مطابق غیر متوازن غذا اور پاؤں کا خیال نہ رکھنا بھی اس کی ایک اہم وجہ ہے۔
اے آر وائی ڈیجیٹل کے مارننگ شو گڈ مارننگ پاکستان میں بیوٹی ایکسپرٹس نے بتایا کہ زیادہ تر وقت ننگے پاؤں رہنا بھی ایڑھیوں کو خراب کرتا ہے، روز رات کو سونے سے قبل پاؤں اچھی طرح دھو کر موائسچرائزنگ کریم لگائی جائے تو پاؤں خوبصورت رہ سکتے ہیں۔
پھٹی ہوئی ایڑھیوں کو مندمل کرنے کا طریقہ نہایت آسان ہے۔
سب سے پہلے ایک عدد شلجم لے کر اسے ابال لیں اور اس کا پیسٹ بنا لیں، شلجم خشکی دور کرنے اور پھٹی ہوئی جلد کو مندمل کرنے کے لیے نہایت معاون ہے۔
اس میں 1 چمچ کڑوے بادام کا تیل شامل کریں، گیندے کا ایک پھول لے کر اسے مسل کر اس میں شامل کردیں۔ گیندے کا پھول جلد کی مرمت کی خاصیت رکھتا ہے۔
اس آمیزے کو رات میں سونے سے قبل لگائیں اور ایڑھیوں پر کپڑا باندھ لیں یا موزے پہن لیں۔ صبح اٹھ کر دھو لیں۔ 3 سے 4 دن میں واضح فرق نظر آئے گا۔
بیوٹی ایکسپرٹس کے مطابق ابلے ہوئے شلجم کے پیسٹ سے دن میں ایک بار ہاتھوں کا بھی مساج کرلیا جائے تو ہاتھوں کی خشکی ختم ہوجاتی ہے اور موسم سرما میں بھی ہاتھ خوبصورت اور نرم و ملائم رہتے ہیں۔
