لمبی اور سڈول گردن جسمانی خوبصورتی کا اہم حصہ ہے اور اگر گردن چہرے سے موٹی یا بے ڈھب ہو تو خوبصورت چہرے کا تاثر بھی بگاڑ سکتی ہے۔
گردن کی ساخت موٹاپے یا بعض اوقات ٹانسلز کی وجہ سے خراب ہوجاتی ہے۔ لیکن بے فکر ہوجائیں، آپ کسی بھی قسم کی گردن کو چند آسان تراکیب کے ذریعے خوبصورت بنا سکتے ہیں۔
گردن کی ورزشیں
گردن سے زائد چربی ختم کرنے کے لیے گردن کی مخصوص ورزشیں فائدہ مند ثابت ہوں گی جو مندرجہ ذیل ہیں۔
گردن کو آگے اور پیچھے کریں اور اس دوران منہ کو کھولیں اور بند کریں، یہ عمل 5 بار دہرائیں۔
گردن کو پیچھے کی طرف لے جائیں اور آسمان کو چومنے کی کوشش کریں۔ یہ عمل 30 سیکنڈ تک دہرائیں۔
اپنی گردن کو جتنا ممکن ہو دائیں اور بائیں طرف لے جائیں۔ اسی طرح پیچھے کی طرف لے جائیں اور 10 سیکنڈ تک اسی پوزیشن میں رکھیں۔
گردن کو سیدھا رکھتے ہوئے ہونٹوں کو اس انداز سے حرکت دیں جس سے گردن کی جلد پر کھنچاؤ ہو۔
گردن پر ماسک لگائیں
ویسے تو آپ جب بھی چہرے پر کوئی بیوٹی ٹپ آزمائیں یا میک اپ کریں تو گردن کو ہرگز نہ بھولیں۔ تاہم گردن کے لیے کچھ مخصوص ماسک بھی ہیں۔
ایک عدد انڈے کی زردی، ایک چائے کا چمچ زیتون کا تیل اور ایک چائے کا چمچ شہد لیں۔ تینوں اشیا کو مکس کر کے گردن پر لگائیں اور 15 منٹ بعد دھولیں۔
گردن کا مساج
وقت ملنے پر گردن کا مساج بھی کیا جاسکتا ہے۔ اس کے لیے ہاتھوں کو اوپر سے نیچے اور نیچے سے اوپر دونوں جانب حرکت دیں۔ کوشش کریں کہ ہاتھوں کا دباؤ ہلکا رکھیں۔