اداکار فیروز خان کی خاتون صحافی سے بحث پر اداکارہ حمائمہ ملک بھائی کی حمایت میں سامنے آگئیں۔
فوٹو اور ویڈیو شیئرنگ ایپ انسٹاگرام پر اداکارہ حمائمہ ملک نے کہا کہ کوئی بھی اداکار، اسٹار، ٹک ٹاکر، یوٹیوبر ہو، ہمیں میڈیا نہیں بناتا میڈیا ایک ذریعہ ہوتا ہے جہاں سے ہم لوگوں تک پہنچتے ہیں۔
انہوں نے کہا کہ ہمیں ہمارے مداح بناتے ہیں، آپ لوگ یہ بات مانتے ہیں۔
واضح رہے کہ لاہور میں انہیں اپنے آئندہ باکسنگ میچ کے لیے ایک پریس کانفرنس میں شرکت کرنی تھی تاہم وہ پریس کانفرنس میں 2.5 گھنٹے تاخیر سے پہنچے تھے۔
دیر سے پریس کانفرنس شروع ہونے پر لاہور سے تعلق رکھنے والی صحافی نے اداکار فیروز خان کو تنقید کا نشانہ بنایا۔
خاتون نے کہا تھا کہ میڈیا کو سختی سے تین بجے پہنچنے کی تاکید کی گئی تھی، اور سب وقت پر موجود تھے، مگر فیروز خان کی دیر سے آمد کی وجہ سے مین اسٹریم میڈیا کے بیشتر نمائندے جا چکے ہیں۔
خاتون صحافی نے کہا تھا کہ فنکاروں کو شہرت اللّٰہ کے کرم کے ساتھ ساتھ مداحوں اور میڈیا کی سپورٹ سے ملتی ہے،جس پر اداکار فیروز خان نے مداخلت کرتے ہوئے کہا کہ کیا میڈیا اسٹار بناتا ہے؟ میڈیا تو پچھلے تین سال سے میرے پیچھے پڑا ہوا ہے۔
صحافی نے اپنا مؤقف دہراتے ہوئے کہا تھا کہ فینز اسٹار بناتے ہیں لیکن میڈیا ہی فنکاروں کو سپورٹ اور پروموٹ کرتا ہے، مگر یہاں موجود افراد پچھلے ڈھائی گھنٹے سے انتظار کر رہے ہیں۔
جواب میں فیروز خان نے تاخیر کی وضاحت دیتے ہوئے کہا کہ میرے گھر میں گرم پانی نہیں آ رہا تھا۔
