گجرات : ایف آئی اے اینٹی ہیومن ٹریفکنگ سرکل گجرات کے عملے نے مختلف کارروائیوں میں یونان کشتی حادثے میں ملوث بدنام زمانہ گروہ کے مزید6 کارندے گرفتار کرلیے۔
اس حوالے سے ایف آئی اے ذرائع کا کہنا ہے کہ انسانی اسمگلرز کو کھاریاں، ملک وال،جہلم، لاہور اور گجرات کے مختلف علاقوں سے گرفتار کیا گیا ہے۔
انسانی اسمگلرز نے معصوم شہریوں کو بیرون ملک یورپ بجھوانے کا جھانسہ دے کر ان سے کروڑوں روپے بٹورے، ملزمان نے متعدد شہریوں سے فی کس 25 سے 27 لاکھ روپے وصول کئے۔
ایف آئی اے کے مطابق ملزمان میں اسلم دریکاں والا، حسنین شاہ، صفدر ، ارشد گجر، محمد اشرف اور ممتاز حسین شامل ہیں، ملزمان کیخلاف مقدمات درج کرلیے گئے ہیں۔
ذرائع کے مطابق ملزمان انسانی اسمگلنگ کے بڑے گروہ کے طور پر کام کر رہے تھے، گرفتار ملزمان کے خلاف پہلے بھی متعدد مقدمات درج ہیں، ملزمان کے انٹرنیشنل اسمگلنگ کے گروہ سے بھی رابطے تھے۔
ترجمان ایف آئی اے کا کہنا ہے کہ انسانی اسمگلر اسلم دریکاں والا بیشتر شہریوں کو غیر قانونی راستوں سے بیرون ملک بھجوا چکا ہے، انسانی اسمگلر لیبیا سے یورپ بذریعہ کشتی بھجوانے میں ملوث تھے۔
