نیو یارک : امریکہ میں راہ چلتی خاتون پر پر ایک وحشی نوجوان نے حملہ کردیا اور جنسی زیادتی کی کوشش کرتے ہوئے خاتون کو گردن سے جکڑ لیا لیکن مزاحمت کرنے پر وہ اپنے مقصد میں کامیاب نہ ہوا اور وہاں سے فرار ہوگیا۔
گزشتہ صبح نیو یارک شہر کے ایک فٹ پاتھ پر ایک عورت سے عصمت دری کرنے کی کوشش کرنے والے شخص کی گرفتاری کیلئے مقامی پولیس کارروائی
کر رہی ہے جو واردات کے بعد فرار ہو گیا تھا۔
غیر ملکی خبر رساں ادارے کے مطابق مذکورہ 27 سالہ خاتون صبح سات بجے مین ہٹن کے مڈ ٹاؤن محلے میں فٹ پاتھ پر چلتی ہوئی کہیں جا رہی تھی کہ اچانک ایک شخص نے اسے پیچھے سے پکڑ لیا۔
پولیس کا کہنا ہےکہ سی سی ٹی وی فوٹیج میں دیکھا گیا ہے کہ ملزم نے خاتون کو پیچھے سے آکر دونوں ہاتھوں سے گلے سے پکڑ لیا اور اسے گھسیٹ کر ساتھ ہی ایک گلی میں لے گیا۔
ملزم نے خاتون سے دست درازی کرنے کی کوشش کی اس دوران خاتون نے بھی اس کی گرفت سے نکلنے کی بھرپور کوشش جاری رکھی تاہم کچھ دیر کی تگ و دو کے بعد وہ خاتون جان چھڑانے میں کامیاب ہوگئی۔
سی سی ٹی وی فوٹیج میں دیکھا جا سکتا ہے کہ ملزم واردات کے بعد وہاں سے پیدل بھاگتے ہوئے بآسانی فرار ہو رہا ہے تاہم اس کا چہرہ اور حلیہ واضح طور پر نظر آرہا ہے، ملزم نے چہرے پر ماسک، کالی پتلون ، گرے ٹی شرٹ اور سفید جوتے پہن رکھے تھے۔
نیو یارک پولیس نے واقعے کی رپورٹ درج کرکے تحقیقات شروع کردی ہیں اور عوام سے بھی اپیل کی ہے کہ ملزم کی گرفتاری کیلئے پولیس سے تعاون کریں اور کسی قسم کی معلومات ملنے پر متعلقہ تھانے پر رابطہ کریں۔