The news is by your side.

کینیڈا میں ’فیونا‘ نے تباہی مچادی، مکانات اور گاڑیاں بہہ گئیں

ٹورنٹو: کینیڈا میں ’فیونا‘ نے تباہی مچا دی، مکانات اور گاڑیاں سمندر میں بہہ گئیں۔

تفصیلات کے مطابق فیونا نامی سمندری طوفان نے مشرقی کینیڈا میں گھروں پر ’جھاڑو‘ پھیر کر انھیں سمندر برد کر دیا ہے، شہریوں کی گاڑیاں بھی بہہ گئیں۔

طوفان سے صوبہ اسکونوشوا، پرنس ایڈورڈ آئی لینڈ اور نیو فاؤنڈ لینڈ کے ساحلی علاقے شدید متاثر ہوئے، جہاں لاکھوں افراد بجلی سے محروم ہو گئے ہیں۔

ہفتے کو صبح سورج نکلنے سے قبل آنے والے اس طاقت ور پوسٹ ٹراپیکل طوفان سے سیکڑوں مکانات کی چھتیں بھی اڑ گئی ہیں۔

امریکی میڈیا کے مطابق فیونا پہلے سمندری طوفان تھا جس نے جمعہ کے آخر میں ایک پوسٹ ٹراپیکل طوفان کا روپ دھار لیا، تاہم اس میں پھر بھی سمندری طوفان کی طاقت والی ہوائیں چل رہی تھیں، جس کی وجہ سے تیز بارش کے ساتھ ساتھ بڑی لہریں بھی بنیں۔

طوفان سے کینیڈین صوبوں میں ہلاکتوں یا زخمیوں کی کوئی تصدیق نہیں ہوئی، تاہم روئیٹرز کے مطابق ایک شخص ہلاک ہو گیا ہے۔

ادھر سمندری طوفان نورو فلپائن کے جزیرے لوزون سے ٹکرا گیا ہے، جہاں 150 کلو میٹر فی گھنٹہ کی رفتار سے چلنے والی ہواؤں کے ساتھ موسلا دھار بارش شروع ہو گئی ہے، اور ہزاروں افراد محفوظ مقامات پر منتقل ہو گئے ہیں۔

Comments

یہ بھی پڑھیں