پنجاب میں دو خواتین کو بہیمانہ طور پر قتل کر دیا گیا اس میں ایک خاتون کی اس کے شوہر نے صرف اولاد نہ ہونے کی وجہ سے جان لی۔
اے آر وائی نیوز کے مطابق بہاولنگر کے صدر سرکل کی حدود میں مختلف واقعات میں دو خواتین کا سفاکانہ قتل کر دیا گیا جب کہ ملزمان موقع سے فرار ہو گئے۔
صدر تھانے کے علاقے نادر شاہ میں بلال نامی شخص نے اپنی بوی ارشاد بی بی کو اولاد نہ ہونے کی پاداش میں بے دردی سے مار ڈالا اور موقع سے فرار ہو گیا۔
ریسکیو حکام کے مطابق ملزم بلال اور مقتولہ ارشاد بی بی کی دو سال قبل شادی ہوئی تھی اور شوہر اپنی بیوی کو اولاد نہ ہونے کے طعنے دیتا رہتا تھا۔
قتل کی دوسری واردات صدر کے علاقے تھانہ مدرسہ کی حدود بستی ڈھوڈیاں میں ہوئی جہاں بھائی کے ہاتھوں بہن موت کے منہ میں چلی گئی۔
بتایا جا رہا ہے کہ ملزم ساجد اور مقتول بہن سلمیٰ بی بی کے درمیان گھریلو جھگڑا چل رہا تھا جس پر ساجد نے اپنی بہن پر گولیاں برسا دیں اور جائے وقوعہ سے فرار ہو گیا۔
پولیس نے لاشیں پوسٹ مارٹم کے لیے اسپتال منتقل اور ملزمان کی تلاش شروع کر دی ہے۔