حیدرآباد میں مالک مکان اور کرایہ دار میں جھگڑے کے دوران صلح کروانے والا شخص گولی لگنے سے جاں بحق ہوگیا، ملزم واقعے کے بعد فرار ہوگیا۔
اے آر وائی نیوز کی رپورٹ کے مطابق حیدرآباد کے تھانہ حالی روڈ کی حدود میں تین ماہ سے کرایہ کی عدم ادائیگی پر مالک مکان اور کرایہ دار کے درمیان ہونے والے جھگڑے میں تیسرا شخص جان کی بازی ہار گیا۔
اس حوالے سے پولیس حکام کا کہنا ہے کہ ملک مالک مکان چینا ولد شوکت گدی اور کرایہ دار فیصل کے درمیان کرائے کی عدم ادائیگی پر شدید تلخ کلامی ہوگئی۔
اس موقع پر جھگڑا ختم کروانے کیلیے آنے والے چالیس سالہ شخص سنی گدی کو ملزم شوکت گدی نے گولی مار کر قتل کر دیا۔
پولیس کے مطابق مقتول صلح کروانے کے لیے پہنچا تھا جس کو مالک مکان شوکت گدی نے غصے میں آکر گردن میں گولی مار دی۔
مقتول سنی کی لاش کو قانونی کارروائی کیلیے سول اسپتال حیدرآباد منتقل کر دیا گیا جب کہ ملزم جائے وقوعہ سے فرار ہونے میں کامیاب ہوگیا جس کی گرفتاری کیلیے چھاپے مارے جارہے ہیں، واقعے کی مزید تفتیش جاری ہے۔
حیدرآباد : سیاسی جماعت کے اہم عہدیدار کو قتل کردیا گیا
واضح رہے کہ حیدرآباد کی یوسی ہٹڑی میں نامعلوم ملزمان نے فائرنگ کردی جس کے نتیجے میں سابق یوسی چیئرمین کامل علی شاہ موقع پر ہی جاں بحق ہوگئے۔
پولیس کے مطابق کامل علی کو نواحی گوٹھ میں نامعلوم افراد نے گھرکے باہراس وقت نشانہ بنایا جب وہ اپنی گاڑی میں بیٹھ رہے تھے۔
