کراچی: شہری ہوابازی کی بین الاقوامی تنظیم اکاؤ کی جانب سے جناح انٹرنیشنل ایئرپورٹ کراچی کے یونیورسل ایوی ایشن سیکیورٹی آڈٹ کامیابی سے مکمل ہو گیا ہے۔
شہری ہوابازی کی بین الاقوامی تنظیم ICAO کی چار رکنی آڈٹ ٹیم آسکر انابیل روبیو کی سربراہی میں دس روزہ ایوی ایشن سیکیورٹی آڈٹ کے لیے 18 فروری کو کراچی ایئرپورٹ پہنچی تھی، اس آڈٹ کا مقصد گلوبل ایوی ایشن سیکورٹی کے معیار کو مسلسل مانیٹرنگ اور آڈٹ کے ذریعے بہتر بنانا تھا۔
آڈٹ کے سلسلے میں سول ایوی ایشن اتھارٹی نے تمام متعلقہ اداروں سے کوآرڈینیشن کی، جب کہ ایئر پورٹس سیکیورٹی فورس نے آڈٹ کے سلسلے میں تمام عملی اقدامات کے عمل درآمد کو یقینی بنایا، جو کہ پاکستان میں شہری ہوا بازی اور ہوائی اڈوں کی حفاظت کی ذمہ دار فیڈرل فورس ہے اور ایئر پورٹس کی حفاظت، مسافروں کی اسکریننگ، داخلی کنٹرول، کارگو اور پیرامیٹر کی سیکیورٹی اور ایئرپورٹس پر امن و امان کو یقینی بنانے کا آئینی مینڈیٹ رکھتی ہے۔
اس سے قبل آڈٹ کی تیاری کےسلسلے میں ہیڈ کوارٹر اے ایس ایف کی ہدایت پر اے ایس ایف ہیڈ کوارٹر کے افسران پر مشتمل ایک ٹیم بھی جناح ایئرپورٹ کا پری آڈٹ کر چکی تھی۔ کراچی ایئرپورٹ پر آڈٹ کے باقاعدہ آغاز سے پہلے اے ایس ایف نے آڈٹ ٹیم کو سیکیورٹی انتظامات سے متعلق دستاویزات بشمول سیکیورٹی اور ٹریننگ پروگرامز اور متعلقہ قوانین و ضوابط، ایس او پیز اور Protocol Questions کے حوالے سے مفصل بریفنگ دی۔
انسپیکشن ٹیم نے ایئرپورٹ کے سیکیورٹی انتظامات کا عملی جائزہ لینے کے لیے جناح انٹرنیشنل ایئرپورٹ کا دورہ کیا، جہاں چیف سیکیورٹی آفیسر اے ایس ایف نے ٹیم کو ایئرپورٹ پر سیکیورٹی ڈیپلائمنٹ، داخلی کنٹرول، اسکریننگ، پاسز کے اجرا، سیکیورٹی ایکوئپمنٹ، اور ہنگامی حالات سے نمٹنے کے لیے اے ایس ایف کی استعداد کے حوالے سے بریفنگ دی۔
آڈٹ کے اختتام پر سول ایوی ایشن ہیڈ کوارٹر میں اختتامی تقریب کے دوران آڈٹ ٹیم نے پاکستان میں ایوی ایشن سیکیورٹی کے انتظامات کو سراہتے ہوئے کہا کہ پاکستان نے ایوی ایشن سیکیورٹی کے حوالے سے نہ صرف 2023 کے تمام اہداف کو کامیابی سے حاصل کر لیا ہے بلکہ یہ اقدامات ICAO کے 2030 کے لیے مقرر کردہ بین الاقوامی معیار کے اہداف کے قریب تر ہیں، جو پاکستان کے لیے باعث اعزاز ہے۔
سیکیورٹی آڈٹ کی کامیاب تکمیل پر ہیڈ کوارٹر ایئرپورٹ سیکیورٹی فورس نے تمام متعلقہ اداروں اور ایجنسیوں کا شکریہ ادا کیا، جنھوں نے اپنے بھرپور تعاون سے آڈٹ کی کامیابی کو یقینی بنایا۔
