کراچی: عالمی ہوا بازی کی تنظیم اکاؤ نے دوسرے روز بھی جناح انٹرنیشنل ایئرپورٹ کا دورہ کیا۔
تفصیلات کے مطابق عالمی ہوابازی کی تنظیم اکاؤ یونیورسل سیکیورٹی مونٹریال کی ٹیم آڈٹ کے سلسلے میں آج دوسرے روز بھی کراچی ایئرپورٹ پہنچی، جہاں اے ایس ایف نے سیکیورٹی سے متعلق بریفنگ دی۔
اکاؤ کی ٹیم نے اے ایس ایف کی جانب سے سیکیورٹی اور سی سی ٹی وی کے مانیٹرنگ ایریا کی مکمل جانچ پڑتال کی، کراچی سے جدہ جانے والی پی آئی اے کی پرواز پی کے 731 کے مسافروں کے سامان اور ان کی سیکیورٹی چیکنگ کی مکمل جانچ پڑتال کی گئی۔
ذرائع کے مطابق عالمی ہوا بازی کی ٹیم کو جہاز میں مسافروں کے سامان منتقل ہونے سے قبل چیکنگ اور کارگو ایریا کا بھی دورہ کرایا گیا، پی آئی اے انتظامیہ کی جانب سے ٹیم کو مسافروں کے بورڈنگ اور دیگر پروسز سے متعلق بھی بریفنگ دی گئی۔
واضح رہے کہ عالمی ہوا بازی کی ٹیم 10 روزہ دورے پر پاکستانی ایئرپورٹس کا آڈٹ کر رہی ہے۔
