کراچی: عالمی ہوا بازی کی تنظیم اکاؤ یونیورسل سیکیورٹی مونٹریال آڈٹ پروگرام کے تحت کراچی کا دورہ کرے گی۔
تفصیلات کے مطابق اکاؤ یونیورسل سیکیورٹی مونٹریال کی ٹیم 5 سال بعد کراچی کا دورہ کرے گی، اکاؤ کی 4 رکنی ٹیم دس روزہ دورے پر روبیو آسکر کی قیادت میں 18 فروری کو کراچی پہنچے گی۔
اکاؤ مونٹریال کی ٹیم جناح انٹرنیشنل ایئرپورٹ پر ایئرپورٹ سیکیورٹی اور پروازوں سے متعلق جانچ پڑتال کرے گی، اور سی اے اے اکاؤ کی ٹیم کو ایئرپورٹ پر کیے جانے والے اقدامات کے حوالے سے بریفنگ دے گا، اور اس حوالے سے ایک پریذنٹیشن بھی پیش کی جائے گی۔
یہ وفد کراچی ایئرپورٹ کی سیکیورٹی، کارگو، فلائٹ کچن، گراؤنڈ ہینڈلنگ سمیت دیگر شعبہ جات کا آڈٹ کرے گا، اکاؤ کے وفد کو سی اے اے کی جانب سے قائم کردہ جوائنٹ سرچ بیگیجز کاؤنٹر کا دورہ بھی کرایا جائے گا۔
وفد مسافروں کے سامان، اسکریننگ، جہاز میں سامان منتقل ہونے اور دیگر سیکیورٹی آلات کی جانچ ہڑتال کے عمل کو مانیٹر کرے گا۔ واضح رہے کہ اکاؤ یونیورسل سیکیورٹی مونٹریال کی ٹیم نے آخری فزیکل آڈٹ 2019 میں اور آن لائن 2021 میں کیا تھا۔