ٹی 20 ورلڈ کپ 2024 امریکا اور ویسٹ انڈیز کی مشترکہ میزبانی میں ہو رہا ہے اب آئی سی سی نے میچز کے لیے امریکا میں تین وینیوز کا اعلان کر دیا ہے۔
انٹرنیشنل کرکٹ کونسل نے اعلان کیا ہے کہ آئندہ سال منعقد ہونے والے ٹی 20 ورلڈ کپ کے میچز امریکا کے تین ممالک نیویارک، فلوریڈا اور ٹیکساس میں منعقد کیے جائیں گے۔
آئی سی سی کی جانب سے اس حوالے سے چیف ایگزیکٹیو جیف الارڈائس کا ایک بیان میں جاری کیا گیا ہے جس میں ان کہنا تھا کہ ہم بڑی خوشی سے اس بات کا اعلان کر رہے ہیں کہ امریکا میں پہلی دفعہ منعقد ہونے والا ورلڈ کپ تین وینوز پر کھیلا جائے گا جس میں 20 ٹیمیں حصہ لیں گی۔
انہوں نے کہا کہ امریکا تزویراتی طور پر ایک بہت ہی اہم مارکیٹ ہے اور یہ وینیوز ہمیں دنیا میں کھیلوں کی سب سے بڑی مارکیٹ میں داخل ہونے کا موقع فراہم کریں گے۔
آئی سی سی کے بیان کے مطابق جون 2024 میں ہونے والے ایونٹ کی میزبانی کے حقوق کریبین اور امریکا کو نومبر 2021 میں دیے گئے تھے۔
غیر ملکی میڈیا کے مطابق ورلڈ کپ کے انعقاد کے لیے امریکا میں تیاریاں شروع کر دی گئی ہیں۔ ایونٹ کے لیے نیویارک ناسو کاؤنٹی میں عارضی اسٹیڈیم آئزن ہاور پارک میں تعمیر کیا جائے گا جس میں 34 ہزار شائقین کے بیٹھنے کی گنجائش ہوگی۔
اس کے علاوہ ٹیکساس اور برووارڈ کاؤنٹی فلوریڈا میں موجود گراؤنڈز کی گنجائش کو بڑھایا جائے گا۔
ٹی ٹوئنٹی کرکٹ کا موجودہ چیمپئن انگلینڈ ہے جس نے گزشتہ سال میلبرن میں کھیلے جانے والے فائنل میچ پاکستان کو شکست دی تھی
واضح رہے کہ امریکا میں کرکٹ کا کھیل فروغ پا رہا ہے اور رواں سال امریکا نے اپنی ٹی 20 لیگ ’میجرلیگ کرکٹ‘ کے نام سے رواں سال جولائی میں شروع کی تھی جس کا فائنل گرانڈ ریری اسٹیڈیم ٹیکساس میں ہوا تھا۔
