اسلام آباد : آئی سی سی چیمپئنزٹرافی سے منسلک ضروری انکم ٹیکس کی چھوٹ کی منظوری دے دی گئی، انکم ٹیکس چھوٹ کا ٹیکس پر کوئی اثر نہیں پڑے گا۔
تفصیلات کے مطابق وزیر خزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا ، جلاس میں کئی اہم معاشی فیصلوں کی منظوری دی گئی۔
ای سی سی نے آئی سی سی چیمپئنزٹرافی سے منسلک ضروری انکم ٹیکس کی چھوٹ کی منظوری دے دی ، انکم ٹیکس کی چھوٹ آئی سی سی اور پاکستان کے مشترکہ معاہدوں کے تحت دی گئی، انکم ٹیکس چھوٹ کا ٹیکس پر کوئی اثر نہیں پڑے گا۔
آئی سی سی، پی سی بی اور پی سی بی، آئی سی سی کو انکم ٹیکس میں چھوٹ دے گا، انکم ٹیکس کی چھوٹ کا اطلاق ٹرافی کے انعامات اورآمدن پر ہوگا تاہم چیمپئنز ٹرافی میں سیلز ٹیکس اور فیڈرل ایکسائز ڈیوٹی کی چھوٹ نہیں ہوگی۔
اعلامیے میں کہا گیا کہ کویت میں بکرے اور بھیڑ برآمد کرنے کی سمری پر غور موخر کر دیا گیا۔
اس کے علاوہ وزارت توانائی کیلئے 6.8 ارب روپے کی سپلیمنٹری گرانٹ منظور کرلی گئی اور پاکستان ایل این جی، سوکار کے درمیان ایل این جی فریم ورک کی منظوری دے دی گئی۔
