لاہور: پاکستان بھارت سیریز ہرجانہ کیس میں آئی سی سی نے بھارت کے حق میں فیصلہ سنادیا، پی سی بی کو ہرجانے کی 60 فیصد رقم ادا کرنا ہوگی۔
تفصیلات کے مطابق انٹرنیشنل کرکٹ کونسل نے پاک بھارت سیریز پر ہرجانہ کیس میں بھارت کے حق میں فیصلہ سنادیا ہے، پی سی بی کو ہرجانے کی 60 فیصد رقم ادا کرنا ہوگی، بی سی سی آئی نے کیس پر لگنے والے 2 ملین ڈالرز مانگے تھے۔
پی سی بی کو بھارتی کرکٹ بورڈ کو ایک اعشاریہ دو ملین ڈالر دینا ہوں گے، ماہرین کا کہنا تھا کہ پی سی بی کا کیس کمزور ہے۔
آئی سی سی تنازع کمیٹی کے فیصلے پر پی سی بی نے ردعمل دیتے ہوئے کہا ہے کہ بھارت کے دعوے سے کم فیس دینے کا فیصلہ آیا ہے اس کا مطلب ہے ہمارا کیس میرٹ پر تھا۔
مزید پڑھیں: پی سی بی کو بھارتی کرکٹ بورڈ کے خلاف مقدمہ گلے پڑ گیا
واضح رہے کہ پی سی بی نے سیریز نہ کھیلنے پر بی سی سی آئی کے خلاف کیس کیا تھا، آئی سی سی نے پی سی بی کا کیس خارج کردیا تھا۔
یاد رہے کہ پی سی بی کے سابق سربراہ نجم سیٹھی نے اس کیس پر موقف اختیار کیا تھا کہ ان کا بھارتی کرکٹ بورڈ پر 70 ملین ڈالرز ہرجانے کا کیس بہت مضبوط ہے اور اس کے لیے پی سی بی نے غیرملکی وکلا پر مشتمل ٹیم کروڑوں روپے فیس ادا کی تھی۔
پی سی بی نے کیس جیتنے کے لیے ہر ممکن کوشش کی اور کیس کے لیے 10 کروڑ سے زیادہ کا بجٹ منظور کیا گیا تھا۔
