پاکستان میں جاری آئی سی سی ویمنز ورلڈ کپ کوالیفائر میں شریک ٹیمیں مغل دور کے یادگار شاہی قلعے میں پی سی بی کی شاہی مہمان بنیں۔
آئی سی سی ویمنز ورلڈ کپ کوالیفائر ٹورنامنٹ پاکستان میں جاری ہے جسمیں میزبان ٹیم سمیت 6 ٹیمیں شریک ہیں۔ میچز کے دوران فارغ لمحات کو پرمسرت بنانے کے لیے ایونٹ میں شریک تمام ٹیموں کو بنایا گیا شاہی مہمان۔
پاکستان کرکٹ بورڈ کے چیئرمین محسن نقوی کی جانب سے لاہور کے شاہی قلعہ میں تمام ٹیموں کے کھلاڑیوں اور آفیشلز کے اعزاز میں شاندار تقریب کا انعقاد کیا گیا۔ ٹیموں کے شرکا روایتی گاڑیوں کے بجائے آرٹ کا شاہکار رکشوں اور دیگر غیر روایتی ٹرانسپورٹ میں آئیں۔
چیئرمین پی سی بی نے عالمگیری دروازے پر خود تمام ٹیموں کو خوش آمدید کہا اور گروپ فوٹو بھی بنوایا۔
ٹیمیں جیسے ہی شاہی قلعہ میں داخل ہوئیں تو بگل بجا کر ان کی آمدکا اعلان کیاگیا جبکہ مغلیہ دور کے لباس پہنے کنیزوں نے غیر ملکی مہمانوں کا مغل روایت کے مطابق استقبال کر کے مہمانوں کو حیران کر دیا۔ شاہی کنیزوں نے مہمانوں کی آمد پر فرشی آداب بجا لائیں۔
تقریب میں کتھک رقص کا زبردست مظاہرہ کیا گیا جس سے غیر ملکی مہمان خوب محظوظ ہوئیں اور بھرپور داد بھی دی۔
اس موقع پر آئرش کھلاڑیوں نے ڈھول کی تھاپ پر بھنگڑا بھی کیا جب کہ بانسری کی مدھر دھنوں نے قومی ٹیم کی کھلاڑیوں پر سحر طاری کر دیا، انہوں نے دل دل پاکستان کا نغمہ بھی گنگنایا۔
پی سی بی کی جانب سے تمام مہمان کھلاڑیوں کو شاہی قلعہ، بادشاہی مسجد، مزارِ اقبال اور حضوری باغ کی سیر بھی کرائی گئی۔کھلاڑیوں نے رنگیلے رکشےکی سواری بھی کی۔
