لندن : ورلڈکپ 2019 کے لیے پاکستان کی تیاریاں زور وشور سے جاری ہیں، قومی ٹیم اپنا پہلا وارم اپ میچ آج افغانستان کے خلاف کھیلے گی۔
تفصیلات کے مطابق پاکستان اور افغانستان کے درمیان ورلڈکپ وارم اپ میچ آج برسٹل میں کھیلا جائے گا، میچ پاکستانی وقت کے مطابق دوپہر ڈھائی بجے شروع ہوگا۔
قومی کرکٹ ٹیم کے کھلاڑیوں نے گزشتہ روز برسٹل میں مسلسل دوسرے روز ٹریننگ کی، فاسٹ باؤلر وہاب ریاض نے بھی ٹریننگ میں حصہ لیا۔
پاکستانی ٹیم 26 مئی کو بنگلہ دیش کے خلاف ایک اور وارم اپ میچ کھیلے گی جس کے بعد میگا ایونٹ میں اس کا پہلا میچ 31 مئی کو ویسٹ انڈیز کے خلاف ہوگا۔
ورلڈ کپ، پاکستان کسی بھی ٹیم کو شکست دینے کے لیے تیار ہے، سرفراز احمد
یاد رہے کہ گزشتہ روز لندن میں آئی سی سی ورلڈکپ میں شریک 10 ٹیموں کے کپتانوں کی پریس کانفرنس میں کپتان سرفراز احمد نے کہا کہ بطور کپتان ورلڈ کپ میں قومی ٹیم کی قیادت میرے لیے اعزاز سے کم نہیں اور میری خواہش ہے کہ ہماری ٹیم 1992 کی تاریخ دہرائے۔
