امریکا کے ادارے ہوم لینڈ سیکیورٹی کا کہنا ہے کہ غیر قانونی طور پر مقیم 11 ایرانی شہریوں کو گرفتار کر لیا گیا ہے، یہ گرفتاریاں امریکی امیگریشن حکام اور کسثم حکام کی جانب سے کی گئی ہیں۔
غیر ملکی خبر رساں ادارے کی رپورٹ کے مطابق امریکا کے ادارے ہوم لینڈ سیکیورٹی حکام نے اس بارے میں باضابطہ اعلان گزشتہ روز ایک بیان جاری کر کے دیا۔
بیان میں کہا گیا کہ حکام نے ایک امریکی شہری کو بھی حراست میں لے لیا ہے، اس امریکی پر الزام ہے کہ یہ ایرانی شہریوں کو امریکہ میں غیر قانونی طور پر رکھنے اور قانون نافذ کرنے والے اداروں کو دھمکیاں دینے کا مرتکب ہوا تھا۔
دوسری جانب ایران میں اسرائیل کی خفیہ ایجنسی موساد کیلیے جاسوسی کرنے والے سیکڑوں افراد کو گرفتار کر لیا گیا۔
قطری نشریاتی ادارے الجزیرہ کی رپورٹ کے مطابق ایران کے مقامی میڈیا نے بتایا کہ ایرانی انٹیلی جنس اور سکیورٹی فورسز نے ملک بھر میں اسرائیل کے جاسوسی نیٹ ورک کا حصہ ہونے کے شبے میں 700 سے زائد افراد کو گرفتار کیا۔
فارس نیوز ایجنسی اور سرکاری خبر رساں ادارے نورنیوز نے رپورٹ کیا کہ مشتبہ افراد کو ایران اسرائیل 12 روزہ جنگ کے دوران گرفتار کیا گیا تھا۔
ایران کے خلاف اسرائیل کی فوجی حملوں میں تل ابیب کی انٹیلی جنس کارروائی بھی شامل تھیں جس میں اعلیٰ فوجی حکام اور ممتاز جوہری سائنسدانوں کی ٹارگٹ کلنگ کی گئی۔
واضح رہے کہ ایران میں موساد کیلیے جاسوسی کرنے والے متعدد افراد کو نہ صرف گرفتار کیا جا چکا ہے بلکہ پھانسیاں بھی دی گئیں۔
تہران حکومت کی طرف سے پچھلی بڑے پیمانے پر گرفتاریوں کو انسانی حقوق کے گروپوں نے مناسب عمل نہ ہونے پر تنقید کا نشانہ بنایا۔
چند روز قبل ایران میں اسرائیل کی بدنام زمانہ خفیہ ایجنسی موساد کے ایجنٹ کو جاسوسی کے الزام میں پھانسی دی گئی۔
ایران اسرائیل کشیدگی سے متعلق تمام خبریں
ایرانی عدالتی خبر رساں ادارے میزان آن لائن نے بتایا کہ اسرائیل کیلیے جاسوسی کے الزام میں مجرم کو پھانسی دے دی گئی، مجید کو آج صبح فوجداری طریقہ کار کے مکمل عمل سے گزرنے کے بعد اور سپریم کورٹ سے اس کی سزا کی توثیق کے بعد پھانسی دی گئی۔
