کراچی : ہارمونیم میں منشیات چھپا کر بیرون ملک اسمگلنگ کرنے والے دو مسافروں کو گرفتار کرلیا گیا۔

تفصیلات کے مطابق ہارمونیم میں آئس چھپا کر بیرون ملک اسمگلنگ کی کوشش ناکام بنادی گئی، ائیرپورٹس سیکورٹی فورس نے کراچی اور اسلام آباد ایئرپورٹس پر کارروائیاں کی، جس میں 2 مسافروں کو گرفتار کرلیا۔

ترجمان نے بتایا کہ کراچی سے دبئی جانے والے مسافر سے ڈیڑھ کلو آئس برآمد ہوئی ، شوکت خان نامی مسافر ہارمونیم ساتھ لے جارہا تھا،شبہ پر تلاشی لی گئی۔

ترجمان کا کہنا تھا کہ اسلام آبادایئرپورٹ پر بھی ہارمونیم سے 2 کلو آئس برآمد کرکے مسافر کو گرفتار کرلیا گیا تاہم دونوں ملزمان کواےاین ایف حکام کے حوالے کر دیا گیا ہے۔

یاد رہے اےاین ایف کی مختلف شہروں میں منشیات اسمگلنگ کے خلاف کریک ڈاؤن جاری ہے، اس دوران حکام نے 11 کارروائیوں میں نائیجرین باشندے سمیت 15 ملزمان کو گرفتار کیا تھا۔