اسلام آباد: حکومت پاکستان کے احساس پروگرام میں اسلامی ترقیاتی بینک نے تعاون کی پیش کش کر دی ہے، وزیر اعظم عمران خان نے بینک کے تعاون پر ان کا شکریہ ادا کیا۔
تفصیلات کے مطابق اسلامی ترقیاتی بینک نے پاکستان کو انسانی ترقی اور اقتصادی استحکام میں تعاون کی پیش کش کی ہے۔
صدر اسلامی ترقیاتی بینک نے کہا ہے کہ آئی ڈی بی حکومت پاکستان کے احساس پروگرام میں تعاون کرے گا۔
وزیر اعظم عمران خان نے اسلامی ترقیاتی بینک کی پاکستان سے طویل شراکت داری پر اظہارِ مسرت کیا اور پولیو کے خاتمے، اقتصادی ترقی میں تعاون پر بینک حکام کا شکریہ ادا کیا۔
یہ بھی پڑھیں: غربت میں کمی کیلئے احساس پروگرام حکومت کا اہم منصوبہ ہے، وزیراعظم عمران خان
وزیر اعظم عمران خان نے کہا کہ پاکستان اسلامی ترقیاتی بینک کے ساتھ منصوبوں میں تعاون کو فروغ دے گا۔
واضح رہے کہ احساس پروگرام کا اعلان وزیرِ اعظم عمران خان نے 27 اپریل کو کیا تھا، اس ’غربت مٹاؤ پروگرام‘ کا نام ’احساس اور کفالت‘ رکھا گیا، پروگرام کے تحت بیواؤں، یتیموں اور بزرگوں کو مالی مدد دی جائے گی۔
وزیر اعظم کا کہنا تھا غربت مٹاؤ پروگرام انسانیت کے راستے پر چلنے کی پہلی کوشش ہے، انسانیت کی مدد کرنا ریاست کی ذمہ داری ہونی چاہیے، چین کی ہر پالیسی میں غربت کے خاتمے کا وژن ہے۔
