کراچی : نویں سالانہ دفاعی نمائش آئیڈیاز 2016 کے باقاعدہ افتتاح کے بعد پاکستانی اور دنیا بھر سے آئے ہوئے اسلحے کو نمائش کے لیے پیش کردیا گیا ہے۔ نمائش کا باقاعدہ افتتاح وزیر اعظم میاں محمد نوازشریف نے کیا۔
اس موقع پر تینوں ملسح افواج کے سربراہان، وزیر اعلیٰ سندھ مراد علی شاہ ، وفاقی وزیر برائے دفاعی پیداوار رانا تنویر اور وزیر دفاع خواجہ آصف نے شرکت تھے۔
میاں محمد نواز شریف نے مسرت کا اظہار کرتے ہوئے کہا کہ ’’آئیڈیاز 2016 دفاعی صنعت میں کامیابیوں کا منہ بولتا ثبوت ہے‘‘۔
افتتاحی قریب کے آغاز پر قومی ترانہ بجایا گیا۔
ڈائریکٹر میڈیا ڈیفنس ایکسپورٹ پروموشن آرگنائزیشن ائیر کموڈر طاہر جاوید کے مطابق رواں سال نمائش میں شرکت کرنے والے ممالک کی تعداد میں اضافہ ہوا ہے، گزشتہ سال کی نسبت امسال 9ممالک شریک ہوئے ہیں۔
نمائش میں 261 غیر ملکی اور 157 پاکستانی اسلحہ ساز کمپنیوں کی جانب سے مصنوعات پیش کی جارہی ہیں جبکہ دنیا بھر سے آئے ہوئے 43 ممالک کے 90 دفاعی وفود اس نمائش کا دورہ کریں گے۔
آئیڈیاز 2016 کے لیے ایکسپوسینٹر کے 8 ہال مختص کیے گئے ہیں، اس کے علاوہ پاکستان کی جدید اور نئی دفاعی مصنوعات نمائش کے لیے پیش کی جارہی ہیں۔
پاکستانی اسلحہ ساز کمپنیوں کی جانب سے تیار کردہ الخالد ٹینک، جے ایف تھنڈر، کے ایٹ ائیر کرافٹ سمیت فاسٹ اٹیک ائیرکرافٹ کے علاوہ مختلف میزائلز بھی نمائش کا حصہ ہیں۔
نویں بین الاقوامی دفاعی نمائش آئیڈیاز 2016 حکومت پاکستان کے تعاون سے ڈیفنس ایکسپورٹ پروموشن آرگنائزیشن منعقد کررہی ہے۔
نمائش کے حوالے سے سیکیورٹی کے بھی سخت ترین انتظامات کیے گئے ہیں، اطراف کی عمارتوں پر پولیس اور رینجرز کے جوانوں کو تعینات کیا گیا ہے۔
سولہ سال قبل شہر قائد کے ایکسپو سنٹر میں ’آئیڈیاز‘ کے نام سے اک سفر کا آغاز کیا گیا تھا۔
آج یہ نمائش دنیا کی بڑی اور اہم دفاعی نمائشوں میں شمار ہوتی ہے‘ رواں سال منعقد ہونے والی آئیڈیاز 2016 دفاعی تجارت بڑھانے کے سلسلے کی یہ نویں نمائش ہے۔
پہلی بار اس نمائش کا انعقاد سن 2000 میں کیا گیا تھا جس کے بعدسے اب تک اس نمائش میں آ نے والے شرکاء اور اس کی کامیابی کے تناسب میں ہر مرتبہ اضافہ دیکھنے میں آتا ہے۔
