قومی کرکٹ ٹیم کے بلے باز افتخار احمد نے پاک بھارت میچ سے قبل بات کرتے ہوئے کہا ہے کہ ہمیں صرف بھارت سے نہیں ایشیا کپ بھی جیتنا ہے۔
ایشیا کپ میں پاکستان اور بھارت کی ٹیمیں آج ایک دوسرے کے مد مقابل آئیں گی، جبکہ سری لنکا کے شہر کینڈی میں موسم قدرے بہتر ہوچکا ہے، بارش کے امکانات پہلے سے کافی کم ہیں۔
پاکستان نے بھارت کے خلاف میچ کے لئے قومی ٹیم کا اعلان کردیا ہے، ٹیم میں کوئی تبدیلی نہیں کی گئی بلکہ اسی ٹیم کو برقرار رکھا گیا ہے، واضح رہے کہ ایشیا کپ کے پہلے میچ میں پاکستان نے نیپال کو بڑے مارجن سے شکست دی تھی۔
قومی ٹیم کے مڈل آرڈر بلے باز افتخار نے نیپال کے خلاف سنچری بھی اسکور کی تھی، تاہم اب افتخار احمد کا ایک بیان سامنے آیا ہے جس میں انہوں نے کہا کہ بھارت کے خلاف میچ مُشکل ہوتا ہے لیکن کوشش ہوتی ہے کہ ہر ٹیم کیخلاف کارکردگی دکھاؤں۔
افتخار احمد نے کہا کہ ہمیں صرف بھارت سے نہیں جیتنا بلکہ ایشیا کپ میں بھی فتح حاصل کرنی ہے، انہوں نے کہا کہ انشاء اللہ ایشیاء کپ میں فتح سے ہمکنار ہوں گے۔
